پاكىستاندا ەكسترەميستىك ۇيىم جەتەگىندە جۇرگەن ەكى قازاقستاندىق ۇستالدى
ولار «تابليگ ماركازى» (قازاقستاندا تىيىم سالىنعان «تابليعي جاماعات» راديكالدى ءدىني قوزعالىسى جاقتاۋشىلارىنىڭ وقۋ عيماراتى) سەمينارىندا ءبىلىم العان.
ب ا ق مالىمەتتەرى بويىنشا، «تابليگ ماركازى» سەمينارىندا زاڭسىز تۇرعان ازيا جانە افريكا ەلدەرىنەن كەلگەن 24 شەتەلدىك ستۋدەنت كوشى-قون قىزمەتىنەن ەسكەرتۋ العان سوڭ گۋجرات تۇرمەسىنە جىبەرىلدى.
گۋجرات پوليتسياسىنىڭ وكىلى مەحار اتيكتىڭ ايتۋىنشا، بىرنەشە ستۋدەنتتىڭ ۆيزا مەرزىمى 2015-جىلدىڭ جەلتوقسان ايىندا اياقتالعان، ال كەيبىرى قانداي دا ءبىر ۆيزاسىز تۇرىپ كەلگەن.
ۇستالعان ستۋدەنتتەردىڭ ءبىر بولىگى وزدەرىنىڭ ەلدە بولۋىن نەگىزدەيتىن قۇقىقتىق قۇجات كورسەتە الماعان. سايكەسىنشە شەتەلدىكتەر تۋرالى زاڭدى بۇزدى دەپ تانىلدى.
مەحار اتيكتىڭ حابارلاۋىنشا، پوليتسيا قۇقىق بۇزۋشى ستۋدەنتتەردى تۇتقىنداۋ تۋرالى ءوتىنىم جازدى. گۋجرات سوتى ءوتىنىمدى قاناعاتتاندىرىپ، ءمان-جاي انىقتالعانشا ولاردى ۋاقىتشا قاماۋ تۋرالى شەشىم شىعاردى.
ەكى قازاقستاندىقتان باسقا پاكىستاندا سۋداننىڭ 6 ازاماتى، قىتايدىڭ - 5، يندونەزيانىڭ - 4، تايلاندتىڭ - 2، فيليپپيننىڭ - 2 جانە مايلايزيانىڭ ءبىر ازاماتى ۇستالدى، دەپ جازدى ب ا ق.
ايتا كەتەيىك، قازاقستاندا «تابليعي جاماعات» ەكسترەميستىك ۇيىم دەپ تانىلعان جانە ەل اۋماعىندا ونىڭ قىزمەتىنە تىيىم سالىنعان.
فرانسۋزدىق باسىلىمنىڭ باعالاۋىنشا، يسلامشى ەكسترەميستەردىڭ 80 پايىزعا جۋىعى بۇل ۇيىمنىڭ قاتارىنان شىققان. «تابليعي جاماعاتقا» جابىقتىق ءتان. ۇيىمنىڭ ورتالىقتارى ءۇندىستاندا، پاكىستان مەن بانگلادەشتە ورنالاسقان. ال ونىڭ باعدارلاماسى مەن ماقساتى قوزعالىس كوشباسشىلارىنىڭ شاعىن ورتاسىنا عانا بەلگىلى.
اتالمىش ۇيىم جاقتاستارىنىڭ قاتارىنا وتكەننەن كەيىن جاڭا مۇشەگە ءوزى تۇراتىن جەردە، ودان ءارى وزگە گەوگرافيالىق جەرلەردە بىرنەشە ۋاعىز-ناسيحات جۇرگىزۋ ۇسىنىلادى. بۇدان كەيىن جاڭا مۇشەگە پاكىستاندا وقۋ ورنىندا ءدىني ءبىلىم الۋ ۇسىنىلادى. كۋرستى اياقتاعاننان كەيىن تىڭداۋشىلار جابىق وقۋ ورىندارىندا ودان ءارى بىلىمدەرىن جالعاستىرادى.
