جاس اقىن- جازۋشىلار اراسىندا «التىن تۇعىر» ادەبيەت بايقاۋى
بايقاۋدىڭ باستى ماقساتى - جاس تالاپكەرلەر اراسىندا اۋىلدىڭ رۋحاني ءومىرىن، تىنىس- تىرشىلىگىن، اۋىلدا ءجۇرىپ جاتقان الەۋمەتتىك- ەكونوميكالىق پروتسەستەردى سۋرەتتەۋ، اۋىل قۇندىلىقتارىن ناسيحاتتاۋ، جاس قالامگەرلەر، اقىندار مەن جازۋشىلاردى قولداۋ جانە ولاردىڭ شىعارماشىلىعىن دامىتۋ.
بايقاۋعا 14 پەن 45 جاس ارالىعىنداعى كەز كەلگەن قالامگەر ءوز شىعارماسىن ۇسىنا الادى. ۇمىتكەرلەردىڭ شىعارمالارى مەن جەكە مالىمەتتەرى «ادەبيەت پورتالىندا» كورسەتىلەدى جانە ولار «شىعارمانى ەنگىزۋ» باتىرماسى ارقىلى ورنالاستىرىلادى. ءاربىر قاتىسۋشىنىڭ جەكە پاراقشاسىندا جاريالانعان شىعارمالارعا پورتالعا تىركەلگەن قولدانۋشىلار جۇلدىزشالار ارقىلى داۋىس بەرە الادى. كونكۋرس سوڭىندا ءار نوميناتسيا بويىنشا كوميسسيا مۇشەلەرى قاتىسۋشىلاردى جەكە- جەكە باعالايدى.
بايقاۋعا قاتىسۋ ءۇشىن شىعارمالار ونلاين تۇرىندە «ادەبيەت پورتالىندا» 2016 -جىلعى 1 - جەلتوقسانعا دەيىن ورنالاستىرىلۋى ءتيىس. كوركەمدىك دەڭگەيى تومەن شىعارمالار قابىلدانبايدى. ۇسىنىلعان شىعارمالار بۇعان دەيىن ەش جەردە جاريالانباعان بولۋى شارت. ۇمىتكەر ۇسىناتىن ەڭبەگىن پورتالدا ونلاين ارقىلى جاريالاي الادى، سونىمەن قاتار «ادەبيەت پورتالىنىڭ» ەلەكتروندى پوشتاسى: adebiportal@gmail.com-عا تىكەلەي جولداي الادى.
ايتا كەتەيىك، بايقاۋعا شىعارمالار ءۇش اتالىم بويىنشا: پروزا، پوەزيا، دراماتۋرگيا جانرلارى بويىنشا قابىلدانادى. «اۋىل تاقىرىبىنا ارنالعان ۇزدىك پروزا» (ەسسە، اڭگىمە، پوۆەست) اتالىمى بويىنشا 1-ورىنعا 500 مىڭ تەڭگە، 2-ورىنعا 300 مىڭ تەڭگە، 3-ورىنعا 200 مىڭ تەڭگە بەرىلەدى. قالعان ەكى اتالىم، ياعني «اۋىل تاقىرىبىنا ارنالعان ۇزدىك پوەزيا» (ولەڭ، باللادا، پوەما) مەن «اۋىل تاقىرىبىنا ارنالعان ۇزدىك دراماتۋرگيا» اتالىمدارى بويىنشا دا ءدال وسىنداي جۇلدە قورى بەكىتىلگەن. سونداي- اق، ءۇش نوميناتسيا بويىنشا ءبىرىنشى ورىن العان جەڭىمپازداردىڭ اراسىنداعى ۇزدىك قالامگەرگە «التىن تۇعىر» ادەبي جۇلدەسى تابىس ەتىلەتىن بولادى.
بايقاۋعا قاتىسۋشىلاردىڭ شىعارمالارىن پروزا بويىنشا راحىمجان وتاربايەۆ، مارحابات بايعۇت جانە ەربول بەيىلحان، پوەزيادا تالعات ەشەن ۇلى، ەرقوجا ءالقوجا ۇلى، باۋىرجان قاراعىز ۇلى جانە دراماتۋرگيا بويىنشا جابال ەرعاليەۆ، جولتاي ءالماش، روزا مۇقانوۆا سىندى قازاق ادەبيەتىنىڭ بەدەلدى وكىلدەرى سىن تەزىنەن وتكىزەدى.
كونكۋرس قورىتىندىسى 2016 -جىلى 3 - جەلتوقساندا شىعارىلادى. جەڭىمپازداردى ماراپاتتاۋ 2016 -جىلى 7- جەلتوقساندا وتەدى.
