قازاقستاندا تۇسىك جاساتۋعا تىيىم سالۋ ۇسىنىلدى

استانا. قازاقپارات - قازاقستاندا تۇسىك جاساتۋعا تىيىم سالۋ ۇسىنىلدى. پسيحولوگتار مەن ءدىنتانۋشىلاردىڭ سوزىنشە، بۇل قادام انا مەن بالانىڭ ءومىرىن ساقتاپ قالۋعا كومەكتەسەدى.

«استانا» تەلەارناسىنىڭ ساۋالناماسىنا قاتىسقان گينەكولوگتاردىڭ ايتۋىنشا، قازاقستاندا جىل ساناپ بالا تۋۋ جاسىنا جەتپەگەن قىزداردىڭ تۇسىك جاساتۋى جيىلەپ بارادى ەكەن.

رەسمي ستاتيستيكاعا سايكەس، جىل سايىن 100 مىڭنان اسا بولاشاق انا جاساندى تۇسىك جاساتادى. وعان ەسەپكە الىنبايتىن جەكە-مەنشىك ەمحانالاردى قوسىڭىز.

«قىتايدان اكەلىنىتەن دارىلەر شە؟ ولاردى ساتۋمەن اينالىساتىن ادام ول ءدارىنى قاي كەزەڭدە تۇتىنۋ كەرەكتىگىن بىلمەيدى. ال ونداي پرەپاراتتاردى بەلگىلى مەرزىمدە قولدانۋ كەرەك. الايدا جۇكتىلىكتىڭ 37، 30 اپتالارىندا اتالمىش ءدارىنى قابىلداعان جاندار دا بار. بالا تولىقتاي قالىپتاسىپ بىتكەن كەزەڭدە بۇل دارىدەن كەيىن ءتىرى قالسا دا، دەنساۋلىعىندا كىنارات بولۋى مۇمكىن»، - دەيدى س ق و بويىنشا وتباسىن جوسپارلاۋ باعدارلاماسىنىڭ ۇيلەستىرۋشىسى مارينا تيموفەيەۆا.

سكەپتيكتەردىڭ پىكىرىنشە، حالىق سانى ونسىز دا از قازاقستان ءۇشىن بۇل پروبلەمانى بولدىرماۋ ءۇشىن قاتاڭ شارالار قولدانۋ قاجەت. ءدال وسى سەبەپتى دە ەلدە تۇسىك جاساتۋعا تىيىم سالۋ ماسەلەسى قايتا قوزعالىپ وتىر. وعان اكەلىپ سوقتىرعان باستى سەبەپ - بۇگىندە تۇسىك جاساتۋعا جاسوسپىرىمدەر مەن بالا تۋۋ جاسىنا جەتپەگەن (25 جاسقا دەيىنگى) قىزداردىڭ ءجيى تۇسىك جاساتۋى.

«كونستيتۋتسيادا» مەملەكەت كەز كەلگەن ادامنىڭ قۇقىعىن قورعاۋى ءتيىس دەپ» جازىلعان. بالا دۇنيەگە كەلمەسە دە، ونىڭ جۇرەگى مينۋتىنا 140 رەت سوعادى. سول سەبەپتى تۇسىك جاساتۋعا زاڭ جۇزىندە تىيىم سالعان دۇرىس دەپ ەسەپتەيمىن»، - دەيدى وقو ءدىن ىستەرى باسقارماسى «ءدىني پروبلەمالاردى زەرتتەۋ ورتالىعىنىڭ» پسيحولوگى مادينا وسىمبەكوۆا.

 تۇسىك جاساتۋدىڭ سالدارى نەگە اكەپ سوقتىرۋى مۇمكىن؟ دارىگەرلەردىڭ ايتۋىنشا، ايەلدىڭ اعزاسىندا گورمونالدى وزگەرىستەر ورىن الىپ، ابورت قابىنۋ، ينفەكتسيا جانە اۋىر دەپرەسسياعا دۋشار ەتۋى مۇمكىن. ال ەڭ قورقىنىشتى دياگنوز -  ايەلدەردىڭ بەدەۋ بولىپ قالۋ مۇمكىندىگى. قازىرگى تاڭدا ەرلى-زايىپتىلاردىڭ 17 پايىزى نەمەسە ءاربىر بەسىنشى وتباسى بەدەۋلىكتىڭ زاردابىن تارتىپ ءجۇر.

ءبىر عانا شىعىس قازاقستان وبلىسىندا ە ك و جاساتۋعا كەزەكتە تۇرعان جۇپ سانى 500 دەن اسادى. ال ءبىر جىلدا بۇل ءراسىمدى تەگىن 60 جۇپ قانا جاساتا الادى. ەلىمىزدە رەپرودۋكتسيا جاساۋعا باعىتتالعان 20 كلينيكا بار بولعاننىڭ وزىندە كورسەتكىش وسى. دەنساۋلىق ساقتاۋ مينيسترلىگىنىڭ تالاپتارىنا سايكەس مەملەكەتتىك تاپسىرىس تەك بەس ەمحانادا بار. ولار الماتى، استانا جانە تاراز قالالارىندا.

پروتسەدۋرانى اقىلى تۇردە جاساتۋ ءۇشىن ءبىر ميلليون تەڭگەدەن اسا قاراجات كەرەك.

دارىگەرلەر ارنايى نەسيەلىك باعدارلاما اشۋ ۇسىنىسىمەن تالاي بانكتىڭ تابالدىرىعىن توزدىرسا دا، ازىرگە بۇل باستامانى قولدايتىن جان تابىلماعان. مەديتسينا قىزمەتكەرلەرىنىڭ پىكىرىنشە، ابورتقا تىيىم سالۋ ارقىلى بۇل ماسەلەنى شەشۋ مۇمكىن ەمەس. بەدەۋلىككە دۋشار بولعان جۇپتار مەن قالاۋىنان تىس جۇكتى بولىپ قالعان ايەلدەر ودان ازايمايتىن كورىنەدى.

«قازىر ابورتقا زاڭ جۇزىندە قاتاڭ تىيىم سالۋعا بولمايدى. ونداي جاعدايدا بالانى كوشەگە تاستاپ كەتەتىندەر سانى ارتادى، سالدارىنان قاراۋسىز قالعان بالالاردىڭ سانى ارتادى. پاناسىز بالالار كوبەيىپ، ونىڭ اقىرى الەۋمەتتىك جانجالعا اكەپ سوقتىرادى»، - دەيدى ش ق و قوعامدىق كەڭەسىنىڭ وكىلى ينديرا كاكىموۆا.

بۇل پروتسەدۋرانى قولداۋشىلار دا، وعان قارسى جاندار دا كوپ. ولاردىڭ ءبىرى ەلىمىزدەگى دەموگرافيالىق احۋالدى، انانىڭ مەديتسينالىق كورسەتكىشتەرى مەن دىنگە سەنۋدى، ال ەكىنشىلەرى تاڭداۋ ەركىن جانە قارجى جاعىن ءسوز ەتەدى. ەلىمىزدە انالىق كاپيتال ءالى دە قۇرىلماعان. ال بالا ءوسىرۋ قىرۋار قاراجاتتى تالاپ ەتەدى. وسى سەبەپتى قوعام بەلسەندىلەرى وتباسىن جوسپارلاۋدى كەڭىنەن ناسيحاتتاۋ كەرەكتىگىن العا تارتۋدا.