وبلىس اكىمى كوشپەلىلەر ويىنىنىڭ جەڭىمپازى مۇحتار نيازوۆتى قابىلدادى

قىزىلوردا. قازاقپارات - بۇگىن وبلىس اكىمى ق. كوشەربايەۆ بەلگىلى ايتىسكەر اقىن مۇحتار نيازوۆتى قابىلدادى.

بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

قىرعىزستانداعى كوشپەلىلەر ويىنىنداعى ايتىستا جەرلەسىمىز مۇحتار نيازوۆ پەن قىرعىزستاندىق ازامات بولگونبايەۆ گران-پري جۇلدەسىن جەڭىپ العان بولاتىن. ەكى ەلدەن 18 اقىن قاتىسقان دودا ناتيجەسىندە جۇلدەلى ءبىرىنشى ورىندى جارقىنبەك ناۋشابەكوۆ پەن قىرعىز بولوت نازاروۆ الدى. ەكىنشى ورىندى قىرعىز اقىنى امانتاي قۇتمانالييەۆ پەن قازاقستاندىق نۇرمات مانسۇروۆ ەنشىلەسە، ءۇشىنشى ورىندى اسىلبەك ماراتوۆ پەن قازاق اقىنى ديدار قاميەۆ قاناعات تۇتقان ەدى.

- قىرعىزستاندا وتكەن ايتىس ءوزىمنىڭ عانا ەمەس، بۇكىل قازاق جۇرتشىلىعىنىڭ مەرەيىن ءوسىردى. وبلىس اكىمى ق. ەلەۋ ۇلى قاشاننان ونەر ادامدارىنا دەگەن جاناشىرلىعىن سەزىندىرىپ، بۇگىن ارنايى قابىلداپ، جەڭىسپەن قۇتتىقتاپ، شىعارماشىلىق تابىس تىلەدى. قازاق، قىرعىز، قىتاي ەلدەرىنىڭ اقىندارمەن بىرىگە، تاۋەلسىزدىكتىڭ 25 جىلدىق مەرەكەسى قارساڭىندا سىر ەلىندە ءدۇبىرلى دودا جاساساق دەگەن ۇسىنىس ايتىلدى. ونى ق. ەلەۋ ۇلى ەرەكشە ىقىلاسپەن قابىلداپ، ۇسىنىستى ىسكە اسىرۋعا قولداۋ كورسەتەتىنىن جەتكىزدى. بۇيىرتسا، سىربويىلىقتاردى ۇلكەن دودا كۇتىپ تۇر. ايماق باسشىسىنا ۇلكەن العىسىمدى بىلدىرەمىن، - دەدى مۇحتار نيازوۆ.

اۆتور: ەلۋباي اۋەزوۆ