اقمولالىق بوكسشىلار حالىقارالىق تۋرنيردە ءۇش التىن مەدال يەلەندى
بۇل تۋرالى وبلىستىق ىشكى ساياسات باسقارماسىنىڭ وڭىرلىك كوممۋنيكاتسيالار قىزمەتىنەن حابارلادى.
رەسەيدىڭ ومبى قالاسىندا وليمپيادانىڭ ەكى دۇركىن جەڭىمپازى الەكسەي تيشەنكونىڭ جۇلدەسى ءۇشىن بوكستان حالىقارالىق تۋرنير ءوتتى. وعان رەسەي، قازاقستان، ارمەنيا، اۋعانستان، قىتاي، موڭعوليا جانە وزبەكستاننان كەلگەن بىلعارى قولعاپ شەبەرلەرى قاتىسىپ، باق سىنادى.
ونىڭ ىشىندە قازاقستان قۇراماسى اتىنان قاتىسقان جاتتىقتىرۋشىلار ابزال بالتاكەسكەنوۆ، كونستانتين رىبينسكي جانە اندرەي سپيريدونوۆ باستاعان اقمولا وبلىسىنىڭ بوكسشىلارى جوعارى ناتيجە كورسەتتى.
ايتالىق، 49 كەلى سالماقتا تەمىرتاس ءجۇسىپوۆ، 52 كەلى سالماقتا انۋار باتىرحانوۆ، 81 كەلى سالماقتا ۆاديم كازاكوۆ التىن مەدال يەلەنسە، 56 كەلى سالماقتا سىنعا تۇسكەن نۇرسۇلتان قوسشىعۇلوۆ قولا مەدالدى مىسە تۇتتى.
قازىرگى كەزدە بوكسشىلار الداعى جارىستارعا دايىندىقتارىن باستاپ كەتتى.
