قۇربان ايت مەيرامىنداعى «قايىرىمدىلىق جارمەڭكەسى» - فوتو
«ازىرەت سۇلتان» مەشىتىنىڭ ايەل ۇستازدارى مەن شاكىرتتەرىنىڭ ۇيىمداستىرۋىمەن جىل سايىن وتكىزىلىپ كەلە جاتقان «قايىرىمدىلىق جارمەڭكەسى» جاماعاتتى ءدامى ءتىل ۇيىرگەن تاتتىلەر مەن بۋى بۇرقىراعان ىستىق تاعامدارىمەن قارسى الدى.
بۇعان دەيىن دە بىرنەشە رەت ۇيىمداستىرىلعان «قايىرىمدىلىق جارمەڭكەسىنىڭ» شاراپاتىن جاقسى بىلەتىن جاماعات ساۋدا كورىگىن بىردەن قىزدىرىپ جىبەردى. ايتا كەتەيىك، ءار جارمەڭكەدەن تۇسكەن قارجى تۇگەلىمەن قايىرىمدىلىق شارالارىنا جۇمسالىپ كەلەدى. بۇل جايىندا سايتىمىزدا بىرنەشە مارتە جاريالاعان دا بولاتىنبىز. ال، وسى جارمەڭكەدەن جينالعان قاراجات استانا قالاسىنداعى بالالار ۇيىنە كومەك كورسەتۋگە جۇمسالاتىن بولماق.
كۇرت سۋىتقان كۇز سالقىنىندا مەشىت جاماعاتىنا ىستىق تاعام ۇسىنىپ، جىلى لەبىزدەرىمەن جىلىتقان ساتۋشىلار دا مەرەكەلىك شارانى شارىقتاتىپ، مەشىت اۋلاسىندا مارە- سارە كۇي ورنادى. جۇمساعان قارجىسىنىڭ قايىرىمدىلىق شاراسىنا ارنالاتىن بىلگەندىكتەن دە بولار، ارتىعىن الماي كەتىپ جاتقاندارى دا قانشاما؟ !
«قاسيەتتى ايت مەرەكەلەرى مەن ۇلتتىق مەيرامدار كەزىندە مەشىت اۋلاسىندا «قايىرىمدىلىق جارمەڭكەسى» تۇراقتى تۇردە وتكىزىلىپ كەلەدى. قازىرگى كەزدە جارمەڭكەمىزدىڭ اياسى كەڭەيىپ، سورەلەردەگى تاعامدارىمىز دا تۇرلەنە تۇسۋدە. ءتىپتى، بۇل جولى ءبىزدىڭ جارمەڭكەمىزگە استانا قالاسىنداعى « ءتاپ- ءتاتتى» ، «رافە» ، «مارمەلادكا» ، «چيزي» ، «سلادكايا سكازكا» سەكىلدى كونديتەرلىك كومپانيالارى مەن «ديۆان» مەيرامحاناسى دا اتسالىسىپ، ءوز ونىمدەرىن تەگىن بەرىپ وتىر. العاشىندا قالاي بولار ەكەن دەپ جۇرەكسىنە باستاعان ءىسىمىزدىڭ بۇگىندە وسىنداي ۇلكەن شاراعا اينالعانىنا قۋانىشىتىمىن» ، - دەيدى يگى شارانىڭ ۇيىتقىسى بولىپ جۇرگەن «ازىرەت سۇلتان» مەشىتىنىڭ ۇستازى ەلميرا بۇحاربايەۆا.
