گەرمانيادا ساياحات كەمەسى اپاتقا ۇشىرادى
نەگىزگى سوققى كاپيتان مۇناراسىنا ءتيىپ، تولىعىمەن قيراعان. ەكيپاجدىڭ ەكى مۇشەسى قازا تاپتى، دەپ حابارلادى www.24.kz.
ەرەجە بويىنشا كەمە كوپىر استىمەن وتكەندە كاپيتان مۇناراسىن تومەن ءتۇسىرۋى ءتيىس. الايدا بەلگىسىز ءبىر سەبەپپەن ەكيپاج وسى مىندەتتى ورىنداماعان. اپات باۆاريا جەرىندە بولعان. ەرلانگەن قالاسىنان بۋداپەشتكە باعىت العان كەمە رەين-ماين-دۋناي كانال بويىمەن جۇرگەن. ىشىندە ەكيپاجدىڭ 49 مۇشەسى مەن 181 جولاۋشى بار. ولاردىڭ دەنى - زەينەتكەرلەر. جەرگىلىكتى پوليتسيانىڭ حابارلاۋىنشا، قۇتقارۋ قيمىلدارى ءتورت ساعات بويى جالعاسقان.
«كەمە تەمىرجول كوپىرىن سوققان. وقيعا ورنىنا 220 قۇتقارۋشى مەن ءورت ءسوندىرۋشى جەتتى. الايدا ەكيپاجدىڭ ەكى مۇشەسىن قۇتقارا المادىق. دەنەلەرىن شىعارۋ ءۇشىن ءورت سوندىرۋشىلەر اۋىر تەحنيكا قولدانعان. قازىرگى ساتتە 181 جولاۋشى مەن ەكيپاجدىڭ 47 مۇشەسى قاۋىپسىز جەرگە شىعارىلدى. ولاردى قوناقۇيلەردە جايعاستىرىپ، قاجەتتى كومەگىن بەرىپ جاتىر. وسى كانال بويىمەن قوزعالىس ۋاقىتشا توقتاپ قالدى»، - دەدى ورتالىق فرانكونيا پوليتسياسىنىڭ حاتشىسى ميحاەل پەتتسولد.
