09:21, 12 - قىركۇيەك 2016 | GMT +5
پاراليمپيادادا پاۋەرليفتەرشى قويشىبايەۆا كۇمىس مەدال ەنشىلەدى
استانا. قازاقپارات - قازاقستاندىق پاۋەرليفتەرشى راۋشان قويشىبايەۆا ريو-دە-جانەيروداعى پاراليمپيادا ويىندارىندا كۇمىس جۇلدەگە يە بولدى، دەپ حابارلايدى Sports.kz.
قويشىبايەۆا «كۇمىستى» 67 كەلىگە دەيىنگى سالماق دارەجەسىندە ەنشىلەدى. ونىڭ ناتيجەسى - 113 كەلى. التىن مەدال الەمدىك رەكورد ورناتقان قىتايلىق تان يۋياوعا بۇيىردى (135 كەلى)، قولانى مىسىرلىق ماحمۋد امال (108 كەلى) ولجالادى.
بۇل قازاقستاننىڭ پاراليمپياداداعى ەكىنشى مەدالى: «التىندى» 100 مەتر قاشىقتىققا ەركىن جۇزۋدەن زۋلفيا عابدۋللينا العان ەدى. قازاقستان مەدال جيىنتىعى جونىنەن 35- ورىندا.
