قازاقستان قاجىلارى قاسيەتتى اراپاعا بەت تۇزەدى
قاسيەتتى مەكەنگە كەلگەن باۋىرلارىمىز ءار ءساتىن قۇلشىلىقپەن وتكىزۋدە. بۇل قاسيەتتى مەكەندە جاراتۋشىدان تىلەگەن تىلەكتىڭ بارلىعى قابىل بولادى دەگەن پايعامبارىمىز (اللانىڭ وعان يگىلىگى مەن سالەمى بولسىن). سوندىقتان، اراپاداعى قاجىلار وتباسى مەن تۋعان-تۋىستىڭ اماندىعىن تىلەپ، ەلى ءۇشىن دۇعا جاساۋدا. تىپتەن راحما تاۋىنا كوتەرىلىپ جاتقاندار دا بار.
ق م د ب قاجىلىق ميسسياسىنىڭ جاۋاپتى وكىلى باۋىرجان ءالي ۇلى بۇل مەكەندەگى ءبىر كۇندىك قۇلشىلىق وتىز كۇنگە تەڭ كەلەدى دەيدى.
مۇنداعى قۇلشىلىق ساسكەدەن كۇن ۇياسىنا باتقانشا جالعاسادى. جانە وسى ارالىقتاعى دۇعا-تىلەكتىڭ بارلىعىن اللا قابىل ەتەدى. ەگەر كىمدە-كىم اراپاتتا ءبىر ءسات تە تۇرماسا، قاجىلىق عيباداتىن ورىنداماعان بولىپ سانالادى. مۇحاممەد پايعامبارىمىزدىڭ (اللانىڭ وعان يگىلىگى مەن سالاۋاتى بولسىن) ءبىر حاديسىندە: «قاجىلىق دەگەنىمىز - اراپات. كىمدە-كىم اراپاتقا ۇلگەرسە، قاجىلىققا ۇلگەرگەن بولادى»، دەلىنگەن.
اراپا كۇنىنەن كەيىنگى، ءزۇلحيجا ايىنىڭ 10- جۇلدىزىندا - مەككەگە بارعان ءتاۋاپشىلار قاجىلىق پارىزدىڭ سوڭعى جوراسى - قۇربان ايت مەيرامىنىڭ شارتتارىن ورىندايدى».
بيىل اراپاتتا قمدب قاجىلىق ميسسياسىنىڭ ۇيىمداستىرۋىمەن قاجىلارعا ۋاعىز-ناسيحات ايتىلىپ، دەنساۋلىعىن قاداعاداۋ جۇمىستارى جۇرگىزىلۋدە.
سونداي-اق، قاسيەتتى مەكەندە ءدىني باسقارمانىڭ ۇيىمداستىرۋىمەن بارشا قازاقستاندىق قاجىلار ءبىر مەزەتتە، ءبىر نيەتپەن ەلدىڭ تىنىشتىعى مەن اماندىعىن تىلەپ، دۇعا جاسادى.
