استانادا قاسيەتتى قۇربان ايت نامازى وقىلدى
تاڭ سارىدەن استانالىقتار ۇلىق مەرەكەدە ىزگى نيەتىمەن، مەشىتكە اعىلدى. دۇعا وقىپ، تىلەك تىلەۋگە جيىلعان كىسىنىڭ قاراسى كوپ. «حازىرەت سۇلتان» مەشىتىنە كەلۋشىلەردىڭ كوپتىگى سونشا، ايت نامازىن سىرتتا وقىعاندار دا از بولعان جوق.
قازاقستان مۇسىلماندار ءدىني باسقارماسى 2018-جىلعا دەيىن «ءدىن مەن ءداستۇر» جىلىن جاريالاعان. وسىعان وراي، ءۇش كۇنگە سوزىلاتىن مەرەكە كەزىندە مەشىت اۋلالارىندا قازاق ۇيلەر تىگىلىپ، ۇلتتىق ويىندار ۇيىمداستىرىلادى.
حاديستەردە جىلدىڭ ەڭ قادىرلى كۇنى قۇربان ايتتىڭ العاشقى كۇنى ەكەنى دە ايتىلعان.
قۇربان ايت - كۇللى مۇسىلمان جۇرتىنىڭ ۇلىق مەيرامى. بۇل مەرەكەدە ەكى امال ورىنداۋ شارت: ايت نامازىن وقۋ مەن قۇربان شالۋ. بيىل قالا بويىنشا قۇربان شالۋ ءراسىمى ارنايى بەلگىلەنگەن 8 ورىندا وتۋدە. ءار ورىندا قاساپشىلار مەن دۇعا جاسايتىن يمامدار بار. قۇربان ايتتىڭ ءۇش كۇنىندە رەنجىسكەندەرمەن تاتۋلاسىپ، جاستار ۇلكەندەردىڭ ۇيلەرىنە سالەم بەرە بارسا، مولىنان ساۋاپ الادى دەلىنەدى.
