قازاقستان تانكىشىلەرى كاسىبي مەرەكەلەرىن اتاپ وتۋدە
ق ر ق ك ۇلتتىق اسكەري-پاتريوتتىق ورتالىعىندا تانكىشىلەر كۇنىنە ارنالعان سالتاناتتى جينالىس ءوتتى. بۇل ءىس-شارا قارۋلى كۇشتەر اۋقىمىندا العاش رەت وتكىزىلىپ وتىر. «بۇگىن ەرەكشە مەيرام. تانكىشى بولعانىمدى ماقتان تۇتامىن جانە بۇل قۇرلىق اسكەرلەرىنىڭ باستى سوققى كۇشى دەپ ەسەپتەيمىن. بۇگىندە مۇندا تانكىشى ارداگەرلەر، قازاقستان قارۋلى كۇشتەرىنىڭ ۇزدىك تانكىشىلەرى جينالىپ وتىر»، - دەدى زاپاستاعى گەنەرال-مايور گەننادي نوسونوۆسكي. بۇگىندە تانك قۇرامالارى قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باستى سوققى بەرۋشى كۇشى بولىپ تابىلادى. «بۇل كۇردەلى، قاجىرلى، كەيدە قاۋىپتى، الايدا، قۇرمەتكە تاتيتىنداي ەڭبەك. بارشالارىڭىزعا وتانعا ايانباي قىزمەت ەتۋدە ساتتىلىك، دامۋ جانە دەنساۋلىق تىلەگىم كەلەدى»، - دەدى زاپاستاعى گەنەرال-مايور امانجول وسپانوۆ. سالتاناتتى جيىندا ەستەلىك مەدالدار تابىس ەتىلدى. ال ءىس-شارا قورىتىندىسى بويىنشا مەرەكەلىك كونسەرت ءوتتى.
