بەلارۋستە پارلامەنت سايلاۋى باستالدى

استانا. قازاقپارات - بەلارۋستە ۇلتتىق جينالىس وكىلدەرى پالاتاسىنىڭ (تومەنگى پالاتا) دەپۋتاتتارىن سايلاۋ ءۇشىن التى مىڭنان استام ۋچاسكە اشىلدى.

ونىڭ 47 ءسى رەسپۋبليكادان تىس ۇيىمداستىرىلدى، دەپ حابارلايدى رەسەيلىك ت ا س س اگەنتتىگى.

«7 ميلليون بەلورۋستىك داۋىس بەرۋشىلەر 6018 سايلاۋ ۋچاسكەسىندە دەپۋتاتتىق سايلاۋدا داۋىس بەرە الادى»، - دەپ مالىمدەدى رەسپۋبليكالىق ورتالىق سايلاۋ كوميسسياسى.

سايلاۋ ۋچاسكەلەرىندە ۇلتتىق جانە حالىقارالىق باقىلاۋشىلار بار. ءداستۇر بويىنشا، داۋىس بەرۋ وتەتىن عيماراتتار ماڭىنان ساۋدا نۇكتەلەرى اشىلدى، وندا سايلاۋشىلار داۋىس بەرۋدەن كەيىن ساۋدا جاساي الادى. جەرگىلىكتى بيلىك كوركەم ونەرپاز ۇجىمدارىن شاقىرىپ، سايلاۋ كەزىندە مەرەكە ۇيىمداستىرۋعا ۋادە بەردى.

ورتالىق سايلاۋ كوميسسياسىنىڭ مالىمەتى بويىنشا، پالاتاداعى 110 ورىنعا 484 كانديدات تالاسقا ءتۇسىپ وتىر. جەكە سايلاۋ وكرۋگتەرىندە، اسىرەسە مينسكىدە ءبىر ورىنعا التى-جەتى ادام تالاسۋدا. ەگەر ءبىر مانداتتى وكرۋگ سايلاۋشىلارىنىڭ جارتىسىنان استامى داۋىس بەرسە، سايلاۋ ءوتتى دەپ سانالادى. ەڭ كوپ داۋىس جيناعان كانديدات جەڭىمپاز اتانادى.

پارلامەنت سايلاۋلارىنداعى سايلاۋ ۋچاسكەلەرى جەرگىلىكتى ۋاقىت بويىنشا 20:00 دە جابىلادى. داۋىس بەرۋدىڭ باستاپقى ناتيجەسىن ورتالىق سايلاۋ كوميسسياسىنىڭ ءتورايىمى ليديا ەرموشينا تۇندە جاريالاۋى مۇمكىن.

ۇلتتىق جينالىس وكىلدەرى پالاتاسى مۇشەلەرىنىڭ وكىلەتتىلىگى ءتورت جىلدى قۇرايدى.