قازاقستان رەسەي مەن ا ق ش- تىڭ سيرياداعى ءبىتىم تۋرالى ۋاعدالاستىعىن قولدايدى

استانا. قازاقپارات - ق ر سىرتقى ىستەر مينيسترلىگى رەسەي مەن ا ق ش- تىڭ جەنيەۆاداعى سيريا بويىنشا كەلىسسوزدەرىنىڭ قورىتىندىسىنا وراي مالىمدەمە جاسادى.

بۇل تۋرالى اتالعان ۆەدومستۆونىڭ باسپا ءسوز قىزمەتىنەن حابارلادى.

«قازاقستان رەسپۋبليكاسى 2016-جىلدىڭ 9- قىركۇيەگىندە جەنيەۆادا رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ پەن امەريكا قۇراما شتاتتارىنىڭ مەملەكەتتىك حاتشىسى دجون كەرريدىڭ اراسىندا سيريالىق داعدارىستى رەتتەۋدىڭ جالپى جوسپارىن ازىرلەۋ بويىنشا قول جەتكىزىلگەن ۋاعدالاستىقتى قولدايدى»، - دەلىنگەن مالىمدەمەدە.

 قازاقستاننىڭ سىرتقى ساياسي ۆەدومستۆوسى جانجالعا قاتىسۋشى بارلىق تاراپتى جوسپاردى مۇلتىكسىز ورىنداۋعا جانە سيريانى ساياسي رەتتەۋ بويىنشا سيرياارالىق كەلىسسوزدەردى جاڭعىرتۋ ءۇشىن قولايلى جاعداي جاساۋعا شاقىردى. «قازاقستان رەسپۋبليكاسى سيريانىڭ الەپپو قالاسىنا جانە باسقا دا وڭىرلەرىنە تۇراقتى گۋمانيتارلىق قولجەتىمدىلىكتى قامتاماسىز ەتۋ ءۇشىن سوعىس ءىس-قيمىلدارىن تولىعىمەن توقتاتۋ تۋرالى (2016-جىلدىڭ 12- قىركۇيەگى كۇنى ساعات 00:00 دەن باستاپ) ۋاعدالاستىققا جان-جاقتى قولداۋ بىلدىرەدى.

رەسەي مەن ا ق ش اراسىندا قول جەتكىزىلگەن سيرياداعى تەرروريستەرگە ۇيلەستىرىلگەن سوققى جاساۋ تۋرالى ۋاعدالاستىق لاڭكەستىك قاۋىپتى ءتيىمدى جانە تۇبەگەيلى جويۋ ماقساتىنداعى تولىققاندى حالىقارالىق ىنتىماقتاستىقتىڭ باستاۋى بولادى دەپ ەسەپتەيمىز. بۇل ءادىس 2015-جىلدىڭ قىركۇيەگىندە وتكەن ب ۇ ۇ باس اسسامبلەياسىنىڭ مەرەيتويلىق سەسسياسى اياسىندا پرەزيدەنت نۇرسۇلتان نازاربايەۆ ۇسىنعان ب ۇ ۇ قامقورلىعىنداعى جاھاندىق تەرروريزمگە قارسى كواليتسيا (جەلى) قۇرۋ بويىنشا قازاقستان رەسپۋبليكاسىنىڭ باستاماسىنا ساي كەلەدى»، - دەپ اتاپ وتكەن ق ر سىرتقى ىستەر مينيسترلىگى.