اللەيادا ءاسانالى ءاشىموۆتىڭ جۇلدىزى جارقىرادى

استانا. قازاقپارات - اقيقاتىن ايتقاندا، بۇل كۇندە الماتىدا ءبىر ەمەس، بىرنەشە جۇلدىزدار اللەياسى بار. ونىڭ العاشقىسى «قازاقفيلم» ۇلتتىق كينوستۋدياسىندا بولسا، ودان كەيىن «الماتى» شيپاجايىندا دا اشىلعان.

الايدا حالىققا ەڭبەگى سىڭگەن جانداردى قۇرمەتتەۋ قاشان دا ارتىق ەمەس. ەندىگى ءبىر جۇلدىزدار اللەياسى الماتىلىقتار كوپتەپ جينالاتىن MEGAPark سايدا ويىن- ساۋىق ورتالىعىنىڭ كىرەبەرىسىندە ورنالاسقان.

 ايتقانداي، بۇل جەردە العاشقى بولىپ ەكى دۇركىن وليمپيادا چەمپيونى يليا ءيليننىڭ جۇلدىزى ويىپ تۇرىپ ورىن العان بولاتىن. كەلەسى بولىپ ءوز جۇلدىزىن «دوم» قورىنىڭ جەتەكشىسى ارۋجان ساين جاقتى. جۇلدىزدار شوعىرى مۇنان كەيىن وليمپيادا چەمپيونى الەكساندر ۆينوكۋروۆپەن تولىقتى.

 ال جۇما كۇنى ايگىلى قازاق اكتەرى ءاسانالى ءاشىموۆتىڭ جۇلدىزى جارقىرادى. مەگا- نى دۋمانداتقان وقيعادا بۇكىل عۇمىرىن ونەرگە ارناعان اكتەر ءاسانالى ءاشىموۆ: «بۇگىن مەن ءۇشىن تاريحي جانە قۋانىشتى كۇن، حالقىمنىڭ ماعان دەگەن قۇرمەتى. بۇل جۇلدىز -  مەنىڭ ۇستازدارىمنىڭ، قۇربىلارىمنىڭ، شاكىرتتەرىمنىڭ ەڭبەگى. يگى باستاما جالعاسىن تابۋ قاجەت. وسىنداي شارالاردىڭ ارقاسىندا وسكەلەڭ ۇرپاق تاتۋلىقتان تاربيە الادى، جاڭالىققا قۇشتار بولىپ وسەدى، ۇلى تۇلعالارمەن قاۋىشادى. ونەر مەن سپورت ادامداردىڭ باسىن قوسادى. ءوز ستۋدەنتتەرىمە ۇنەمى: «جۇمىس پەن ەڭبەگىن باعالاعان ادام، قۇرمەت پەن اتاققا يە بولادى دەپ ايتىپ وتىرامىن. ادام اتاق پەن داڭكتى ىزدەمەۋ كەرەك، اتاق ادامدى ءوزى تاۋىپ كەلەدى» . حالقىما، ونەرىمە قىزمەت ەتەمىن!» دەدى.

قازاقستاننىڭ حالىق ءارتيسىن قۇتتىقتاۋعا ارىپتەستەرىمەن بىرگە «قازاقفيلم» كينوستۋدياسىنىڭ پرەزيدەنتى باقىت قايىربەكوۆ، م. ءاۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ەرلان ءبىلال، قازاقستاننىڭ حالىق ءارتىسى التىنبەك قورازبايەۆ، ت. جۇرگەنوۆ اتىنداعى ۇلتتىق ونەر اكادەمياسىنىڭ ستۋدەنتتەرى كەلدى. قىزىقتى شاراعا ساۋدا ورتالىعىندا جۇرگەن الماتىلىقتار دا قوسىلدى.

  «بۇگىنگى تاڭدا تۇلعالى اكتەر م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا سپەكتاكلدەر قويىپ، كينوجوبالارمەن جۇمىس ىستەۋدە. «ەلىم-  اي» كينوستۋدياسىنا باسشىلىق ەتەدى. رولدەرگە، رەجيسسۋراعا، تەاترعا وزىندىك تاسىلمەن قارايدى، ونى كورىپ، تاماشالاۋ كەرەك، مەن ءۇشىن بۇل ادام -  ءمىنسىز. حالىق ءاسانالى اعانى سىيلايدى، قولدايدى جانە ەڭبەگىن جوعارى باعالايدى» ، دەدى اۋەزوۆ تەاترىنىڭ ديرەكتورى ەرلان ءبىلال.

 ايتۋلى شارا اكتەر تاعدىرى تۋرالى «ايناداي ىستەر شەبەرى» اتتى دەرەكتى فيلممەن اياقتالدى. فيلم ءاسانالى ءاشىموۆتىڭ 75  جىلدىعىنا وراي تۇسىرىلگەن. اتالمىش دەرەكتى لەنتانىڭ كورسەتىلىمى الماتىدا العاش رەت وتكىزىلىپ وتىر.

  

ايناش ەسالي، الماتى

سۋرەتتەردى تۇسىرگەن اۆتور.

«ەگەمەن قازاقستان»