برۋك: گولوۆكيننىڭ كوزدەرىنەن قورقىنىش كوردىم، بەلبەۋدى تاعاتىن ءساتتى تاعاتسىزدانا كۇتۋدەمىن
سالماق ولشەۋ راسىمىنەن سوڭ برۋك جەكپە- جەكتە جەڭىسكە جەتەتىنىن جانە قارسىلاسىنان قالايدا بەلبەۋدى تارتىپ الاتىنىن مالىمدەدى.
«مەن گولوۆكيننىڭ كوزدەرىنەن قورقىنىش كوردىم. ول بۇل كەشتىڭ وتە قيىنعا تۇسەتىنىن بىلەدى. ونى بىرنارسە الاڭداتىپ تۇرعان سەكىلدى. مەنىڭ ۋاقىتىم تۋدى جانە بۇگىن بۇكىل الەمدى تاڭقالدىراتىن بولامىن»، - دەدى كەلل برۋك.
ەسكە سالا كەتسەك، برۋك سالماق ولشەۋ راسىمىندە گولوۆكيننەن اۋىر بولىپ شىققان ەدى. بۇل ونىڭ ورتا سالماقتاعى العاشقى كەزدەسۋى. كاسىپقوي شارشى الاڭدا گەننادي گولوۆكين جالپى سانى 35 كەزدەسۋ وتكىزىپ، ونىڭ بارلىعىندا جەڭىسكە جەتسە، 32 جەكپە- جەكتى مەرزىمىنەن بۇرىن اياقتاعان.
ال كەلل برۋك 36 رەت شارشى الاڭعا شىعىپ، ونىڭ بارلىعىندا دەرلىك جەڭىسكە جەتە العان. ال 25 كەزدەسۋىن نوكاۋتپەن اياقتاپتى.
بۇل جەكپە- جەك ءۇشىن قوس بوكسشى دا وزدەرى ءۇشىن ەڭ جوعارعى رەكوردتىق سوماداعى اقشا الادى. كەزدەسۋ ورتا سالماق اياسىندا وتەتىندىكتەن گولوۆكينگە IBO، IBF جانە WBC اتاقتارىن قورعاۋعا تۋرا كەلەدى.
كەزدەسۋ بارىسىندا يامايكالىق مارلون رايت شارشى الاڭداعى تورەشى قىزمەتىن اتقارسا، بوكسشىلاردىڭ ءىس- قيمىلىن گۋيدو كاۆاللەري (يتاليا) ، كرەيگ مەتكالف (كانادا) جانە بەنۋا روسسەل (كانادا) سىندى تورەشى ماماندار باقىلايدى.
«قازاقستان» جانە KazSport تەلەارنالارى جەكپە- جەكتەردى تىكەلەي ەفيردە كورسەتەدى. بوكس كەشى استانا ۋاقىتىمەن تۇنگى 23:00-دە باستالادى.
بۇعان دەيىن گەنا اتالمىش جەكپە- جەك بارىسىندا تورەشىلەر شەشىمى قاجەت بولادى دەپ ويلامايتىنىن ايتقان ەدى. سونداي- اق، ايگىلى فۋتبولشى زلاتان يبراگيموۆيچتىڭ گولوۆكينگە جانكۇيەر بولۋى ءۇشىن بوكس كەشىنە ارنايى باراتىندىعى ايتىلعان ەدى.
