ۇلتتىق بانك حالىققا جيناقتارىن التىنمەن ساقتاۋدى ۇسىنادى
بۇگىن اقوردادا ءوتىپ جاتقان ق ر ۇكىمەتىنىڭ كەڭەيتىلگەن وتىرىسىندا ق ر ۇلتتىق بانكىنىڭ ءتوراعاسى دانيار اقىشيەۆ وسىلاي ءمالىم ەتتى.
«ءبىز حالىققا وزدەرىنىڭ جيناقتارىن قاراپايىم جانە تۇسىنىكتى تاسىلمەن التىن تۇرىندە ساقتاۋدى ۇسىنامىز، بۇل شىن مانىندە شەتەلدىك ۆاليۋتاعا بالاما بولا الاتىن ەدى. بۇل رەتتە ۇلتتىق بانك ەكىنشى دەڭگەيلى بانكتەرمەن بىرلەسە وتىرىپ، وسى نارىقتىڭ ءوتىمپازدىعىن قامتاماسىز ەتۋدى قاراستىرادى. حالىقتىڭ كەز كەلگەن ۋاقىتتا التىندى ساتىپ الۋعا ساتۋعا مۇمكىندىگى بولۋى ءتيىس»، دەدى باس بانكير.
بۇدان بولەك، ۇلتتىق بانك قازاقستاندىقتاردىڭ جيناقتارىن ساقتاۋدى قامتاماسىز ەتۋ ءۇشىن اففينيرلەنگەن التىن قۇيمالارىن يەلەنۋگە قاتىستى ۇگىتتەۋدى جوسپارلايدى. بۇنداي التىن قۇيمالار التىن جانە كۇمىس مونەتالارمەن قاتار جۇرەتىن بولادى.
اۆتور: قانات مامەتقازى ۇلى
