داڭقتى مۋزىكانت ءشامشى قالداياقوۆتىڭ ءومىرى مەن شىعارماشىلىعىنا ارنالعان سەريال جارىق كورەدى
«حابار» اگەنتتىگى كۇزگى تەلەماۋسىمدا مەدياحولدينگتى ترانسفورماتسيالاۋ بويىنشا جۇمىستار جۇرگىزۋدە. ناتيجەسىندە تەلەارنالاردىڭ جۇمىس فورماتى، كونتەنتى جانە ۇيىمداستىرۋ قىزمەتتەرى وزگەرەدى.
«حابار» اگەنتتىگى اقپاراتتىق- ساراپتامالىق باعدارلامالارعا، جاڭالىقتار قىزمەتىنە باسىمدىق بەرىپ كەلەدى. بيىلعى جىلعى ماۋسىمنىڭ ەرەكشەلىگى - ەندى تاڭەرتەڭگى جانە كۇندىزگى جاڭالىقتارىمىز جابىلىپ، ونىڭ ورنىنا 1 - قىركۇيەكتەن باستاپ، كەشكى 19:00-دە قازاق تىلىندە، 21:00-دە ورىس تىلىندە كۇنىنە ءبىر رەت قورىتىندى جاڭالىقتار شىعىپ جاتىر. باستى وزگەرىس - جاڭالىقتاردى ءبىز اقپاراتتىق شوۋ جانرىندا بەرۋدى قولعا الدىق. ءبىر كۇننىڭ باستى تاقىرىپتارى، وزەكتى ماسەلەلەرى ءبىزدىڭ تالداماشى- جۋرناليستەر تاراپىنان تەرەڭ زەرتتەلىپ، ءتۇرلى پىكىرلەردى، ءتۇرلى ۇستانىمداردى بەرۋ ارقىلى جانە ستۋدياداعى جۇرگىزۋشى ساراپشىمەن ءتۇرلى بايلانىس فورمالارىن قولدانۋ ارقىلى كورەرمەنگە جول تارتاتىن بولادى. 1 - قىركۇيەكتەن باستاپ، جاڭالىقتار جاڭا ستۋديادان، جاڭا دەكوراتسيادان شىعىپ، كورەرمەندەرگە ۇسىنىلۋدا»، - دەدى اگەنتتىكتىڭ باسقارما ءتورايىمىنىڭ ورىنباسارى رينات كەرتايەۆ.
سونىمەن قاتار، ونىڭ ايتۋىنشا، «حابار» اگەنتتىگىنىڭ ۇلكەن داستۇرگە اينالعان «جەتى كۇن»، «بيۋرو راسسلەدوۆاني»، «بەتپە- بەت» ارنايى حابارى ىسپەتتەس باعدارلامالار جاڭا ماۋسىمدا فورماسى مەن فورماتى وزگەرىپ، جاڭا ستيلدە شىعا باستادى.
«اگەنتتىك الەۋمەتتىك باعدارلامالارعا ماڭىز بەرىپ وتىر. قىركۇيەكتىڭ باسىنان بەرى ءبىز بىرنەشە الەۋمەتتىك باعدارلامالاردى شىعارا باستادىق. ولاردىڭ ءبىرى - «ءبىزدىڭ نازاردا» دەگەن جوبا. ءبىز كەز كەلگەن تۇرمىستىق- الەۋمەتتىك ماسەلەلەردى بۇكىل رەسپۋبليكاداعى تىلشىلەر قوسىنىن پايدالانا وتىرىپ، قوعامدىق كوزقاراس تۇرعىسىنان زەرتتەپ، كورەرمەننىڭ نازارىنا ۇسىناتىن بولامىز.
ەكىنشى جوبامىز - ول «ءبىلۋ ماڭىزدى». وزدەرىڭىز بىلەسىزدەر، ەلىمىزدە ءتۇرلى مەملەكەتتىك باعدارلامالار، قىزمەت كورسەتۋ باعدارلامالارى مەملەكەت تاراپىنان كوپتەپ قابىلدانۋدا. زاڭعا ەنگىزىلىپ جاتقان وزگەرىستەر، ازاماتتارىمىزعا كۇندەلىكتى قابىلداناتىن كەرەكتى نورماتيۆتىك اكتىلەردى ءتۇسىندىرۋ، ساۋالدار بولسا، ءتيىستى قۇزىرلى ورگانداردىڭ جاۋاپ بەرۋى - وسى جوبانىڭ باستى ماقساتى»، - دەدى ر. كەرتايەۆ.
جانە دە «حابار» ارناسى قۇرىلعان كۇنەن باستاپ، الەۋمەتتىك توك- شوۋلار، قوعامدىق توك- شوۋلار جاساۋدىڭ كوشباسشىلارىنىڭ ءبىرى بولىپ سانالادى. بۇرىننان كەلە جاتقان «ءبىزدىڭ ءۇي» توك- شوۋى تۇرلەنىپ، جاڭا فورماتتا، جاڭا تاقىرىپتارمەن كورەرمەنگە جول تاپسا، جاڭا ماۋسىمنان باستاپ، «داۆايتە گوۆوريت» دەگەن اپتاسىنا ءۇش رەت شىعاتىن الەۋمەتتىك- قوعامدىق توك- شوۋدى كورەرمەنگە ۇسىنۋ جوسپارلانۋدا. بۇل باعدارلامالاردىڭ باستى ماقساتى - حالىق پەن مەملەكەت اراسىندا ءتيىستى قۇرىلىمدار اراسىندا ديالوگ الاڭىن ورناتۋ.
«سونداي- اق «حابار» ارناسى - وتاندىق تەلەۆيزيالىق سەريالداردى تۇسىرەتىن، وسى ءوندىرىستى قولعا العان ەلىمىزدەگى نەگىزگى ارنالاردىڭ ءبىرى. ءبىز بيىل جاڭا ماۋسىمدا ۇلكەن جەتى وتاندىق تەلەحيكايانىڭ تۇساۋىن كەسۋدى جوسپارلاپ وتىرمىز. قىركۇيەك ايىنىڭ 17-سىنەن باستاپ جاڭا سەريالداردىڭ كەرۋەنىن «وگەي جۇرەك» اتتى جاڭا تەلەحيكايا باستايتىن بولادى. بۇل جەردە دە ءبىز الەۋمەتتىك ماسەلەگە باسىمدىق بەردىك - جەتىم بالالار ماسەلەسى. بالانى اسىراپ الۋ ماسەلەسىنە ەرەكشە باسىمدىق بەرىپ وتىرمىز. وزدەرىڭىز بىلەسىزدەر، جەتىمىن جىلاتپاعان حالىقپىز. وتكەندەگى «باۋىرجان»، «كۇلاش»، «قۇستار ءانى» سياقتى سەريالداردىڭ جالعاسى رەتىندە ەلىمىزدىڭ مىقتى تۇلعالارىنا بيوگرافيالىق سەريالداردىڭ ءتۇسىرىلىمىن جالعاستىراتىن بولامىز. بيىلعى جىلعى ءبىزدىڭ جاساپ وتىرعان سىيلىعىمىز - ول بەلگىلى كومپوزيتور، داڭقتى مۋزىكانت ءشامشى قالداياقوۆتىڭ ءومىرى مەن شىعارماشىلىعىنا ارنالعان ارنايى سەريال بولادى. ونى ءبىزدىڭ كورەرمەندەر تاۋەلسىزدىك كۇنى قارساڭىندا كورە الادى. بىلتىر ءبىز اباي بابامىزدىڭ قارا سوزدەرىندە، ءپالساپاسىندا ايتىلعان ويلارىنا نەگىزدەلگەن «اقىلدىڭ كىلتى» اتتى ۇلكەن ءومىر داستانى، ەپوپەيا جوباسىن باستاعان بولاتىنبىز. بيىل ونىڭ ەكىنشى ماۋسىمى شىعادى»، - دەپ ءتۇيدى ءسوزىن اگەنتتىك باسشىسىنىڭ ورىنباسارى.
اۆتور: جاسۇلان جولدىبايەۆ
