جىل سوڭىندا استانانىڭ ىرگەسىندە تاۋىق جۇمىرتقاسىن سالاتىن ىدىس زاۋىتى ىسكە قوسىلادى
بۇل تۋرالى بۇگىن اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا «اقمولا فەنيكس» ج ش س باس ديرەكتورى ماكسيم بوجكو ءمالىم ەتتى.
ونىڭ ايتۋىنشا، «اقمولا فەنيكس» ج ش س كاسىپورنى ەلىمىزدە تاۋىق جۇمىرتقاسى مەن ەتىن ءوندىرۋ بويىنشا كوش باستاپ كەلەدى.
«ءبىزدىڭ «اقمولا فەنيكس» اق كاسىپورنى «CapitalProjectLTD» ج ش س- ءنىڭ «شاڭىراق» حولدينگىنە قارايدى. بۇل بىزگە ۇلكەن مۇمكىندىك بەرىپ وتىر. اسىرەسە، «اقمولا فەنيكس» ا ق وندىرگەن تاۋىق جۇمىرتقاسىن استانا مەن اقمولا وبلىسى اۋماعىنان بولەك ەلىمىزدىڭ ءار وڭىرىندە ساتا الامىز. حالىقتىڭ ءبىزدىڭ ونىمگە دەگەن سۇرانىسى جوعارى. كاسىپورىن جىلىنا 65 ميلليون دانا تاۋىق جۇمىرتقاسىن وندىرەدى. ويتكەنى ءبىز ساپا جاعىنان عانا ەمەس، باعا جاعىنان دا باسەكەلەستىككە تولىق لايىقپىز. ءبىز ءونىمدى باستان اياق باقىلاپ، تۇتىنۋشىلاردىڭ سۇرانىسىنا ساي جۇمىس ىستەيمىز. بۇل بىزگە ۇلكەن باسىمدىق بەرىپ وتىر»، - دەپ اتاپ ءوتتى كومپانيا باسشىسى.
سونىمەن قاتار، ول يندۋستريالاندىرۋدىڭ العاشقى بەس جىلدىعىندا قولجەتكىزگەن جەتىستىكتەرگە دە توقتالدى. بۇل تۇرعىدا كومپانيا جۇمىرتقامەن قاتار، برويلەر تاۋىقتارىنىڭ ەتىن ءوندىرۋدى دە دۇرىس جولعا قويعان.
«2014 - جىلدىڭ سوڭىندا يندۋستريالاندىرۋدىڭ وڭىرلىك كارتاسىنا ەنگەن «CapitalProjectLTD» ج ش س- ءنى ىسكە قوسقان بولاتىنبىز. اتالعان كاسىپورىن جوبا بويىنشا جىلىنا 20 مىڭ توننا سالقىنداتىلعان جانە مۇزداتىلعان تاۋىق ەتى مەن شۇجىعىن شىعارۋعا مۇمكىندىك بەرەدى. كاسىپورىندى تولىق قۋاتىنا 2017 -جىلى شىعارۋدى جوسپارلاپ وتىرمىز. جۇمىس پروتسەسىنە كەلەتىن بولساق، ءبارى اۆتوماتتاندىرىلعان، قول كۇشىن ونشا قاجەت ەتپەيدى. وتكەن جىلى «قازاقستاننىڭ ۇزدىك تاۋارى» بايقاۋىنىڭ وڭىرلىك كەزەڭىندە جۇلدەلى ورىننان كورىنۋىمىز بۇل ءبىزدىڭ دۇرىس باعىتتا كەلە جاتقانىمىزدى بىلدىرسە كەرەك»، - دەي كەلە، ماكسيم بوجكو اعىمداعى جىلدىڭ سوڭىندا ىسكە قوسىلاتىن زاۋىت قۇرىلىسى تۋرالى ايتىپ بەردى.
ونىڭ سوزىنە قاراعاندا جاڭادان اشىلعالى تۇرعان «ەكو پاك استانا» كاسىپورنىندا تاۋىق جۇمىرتقاسىن سالۋعا ارنالعان ساعاتىنا 4000 ىدىس شىعارىلاتىن بولادى. مۇنداعى جوبا قۇنى 480 ميلليون تەڭگەگە باعالانىپ وتىر. ونىڭ 160 ميلليون تەڭگەسى سەرىكتەستىكتىڭ ءوز قالتاسىنان سالىنسا، 320 ميلليون تەڭگەسى ەكىنشى دەڭگەيدەگى بانكتەن نەسيەگە الىنعان. كاسىپورىن قىتايدىڭ قازىرگى زامانعى ءارى ەنەرگيا ۇنەمدەگىش تەحنولوگياسى بويىنشا جۇمىس ىستەيتىن قوندىرعىمەن جابدىقتالعان. مۇندا شىعارىلاتىن ءونىمنىڭ ءبىر ەرەكشەلىگى ول وسى كۇنى قولدانىپ جۇرگەن ىدىستان كولەمىنىڭ 15 م م كىشىرەكتەۋ بولۋىندا. قوراپتىڭ كىشى بولۋى ونىڭ باعاسىنا دا اسەر ەتپەك. نەعۇرلىم قوراپ كىشى بولسا، سولعۇرلىم ارزان ءارى ەۋروپاكەتكە دە ىڭعايلى جايعاستىرىلاتىن كورىنەدى. بۇل ءوز كەزەگىندە جۇمىرتقانى تاسىمالداۋعا ارزان ءارى ىڭعايلى بولماق. زاۋىتتى جىل سوڭىندا ىسكە قوسۋ كوزدەلگەن.
