شاۆكات ميرزيەيەۆ وزبەكستاننىڭ سىرتقى ساياساتتاعى باسىمدىقتارىن جاريا ەتتى
بۇل تۋرالى ەل ۇكىمەتىنىڭ پورتالىندا حابارلاندى.
وزبەكستان پرەزيدەنتى مىندەتىن ۋاقىتشا اتقارۋشى وزبەكستاننىڭ سىرتقى ساياساتتاعى باستى باسىمدىعى رەتىندە ەلدىڭ ۇلتتىق مۇددەسىمەن بايلانىسى بار ورتالىق ازيا ءوڭىرىن اتادى. «ءبىز ءوزىمىزدىڭ تاياۋ كورشىلەرىمىز تۇركىمەنستان، قازاقستان، قىرعىزستان، تاجىكستانمەن قارىم-قاتىناسىمىزدا اشىق، تاتۋلىق جانە پراگماتيكالىق ساياسات جۇرگىزۋىمىزدى مۇلتىكسىز جالعاستىرا بەرەتىن بولامىز»، - دەدى ول.
سونىمەن قاتار وزبەكستاننىڭ سىرتقى ساياساتىنىڭ باسىم باعىتتارى رەتىندە تمد ەلدەرىمەن قارىم-قاتىناستى دامىتۋ، ونىڭ ىشىندە، ءبىرىنشى كەزەكتە رەسەي فەدەراتسياسىمەن دوستىق بايلانىستى كەزەڭ-كەزەڭىمەن دامىتۋ ءارى جان-جاقتى نىعايتۋ اتاپ وتىلگەن.
ش. ميرزيەيەۆتىڭ ايتۋىنشا، ا ق ش- پەن جان-جاقتى ءوزارا ءتيىمدى جانە كونسترۋكتيۆتى ىنتىماقتاستىقتى ساقتاۋ سىرتقى ساياساتتا ماڭىزدى مانگە يە. وزبەكستان قىتايمەن دە جان-جاقتى ستراتەگيالىق سەرىكتەستىكتى ودان ارى نىعايتۋعا مۇددەلى. جاپونيا، كورەيا رەسپۋبليكاسىمەن ەكونوميكا، ينۆەستيتسيا، عىلىم، تەحنولوگيا، ءبىلىم بەرۋ، دەنساۋلىق ساقتاۋ جانە تۋريزم سالالارىنداعى سەرىكتەستىك قارىم-قاتىناستى دامىتۋعا باسىمدىق بەرەدى.
بۇعان قوسا، ەۋروپانىڭ گەرمانيا، فرانسيا، ۇلى بريتانيا سىندى جەتەكشى مەملەكەتتەرىمەن، سونىمەن قاتار ورتالىق جانە شىعىس ەۋروپا ەلدەرىمەن ءوزارا ءتيىمدى ىنتىماقتاستىقتى دامىتۋعا باسا نازار اۋداراتىن بولادى.
سونداي-اق ۇندىستانمەن، پاكىستانمەن جانە ورتالىق ازيانىڭ باسقا دا مەملەكەتتەرىمەن ساياسي، ساۋدا-ەكونوميكالىق، كولىك-كوممۋنيكاتسيالىق، مادەني-گۋمانيتارلىق سالالارداعى ىنتىماقتاستىقتى ودان ارى دامىتۋعا مۇددەلى. وزبەكستان اۋعانستانمەن تاتۋ كورشىلىك جانە دوستىق ساياساتىن دا جالعاستىرا بەرەدى.
