پرەزيدەنت قالالاردىڭ ماڭىندا جەكە تۇرعىن ءۇي قۇرىلىسىن جانداندىرۋدىڭ جولىن ۇسىندى
«اكىمدەرگە مەملەكەتتىك قاجەتتىلىككە، ونىڭ ىشىندە جەكە تۇرعىن ءۇي قۇرىلىسىنا جەرلەردى ساتىپ الۋ قۇقىعىن بەرۋ كەرەك. بۇل نەنى بىلدىرەدى؟ اتاپ ايتقاندا، قالالاردىڭ اينالاسىندا جانە ىشىندە بوس جەر جوق. ياعني، قالا ماڭىنداعى جەرلەردى يەلەنىپ العاندار، ەندى سونى وزدەرى ۇستاپ وتىر. وسى رەتتە اكىمدەر بۇل جەر تەلىمدەرىن حالىققا ۇسىنا المايدى»، - دەپ توقتالدى پرەزيدەنت اقورداداعى ۇكىمەتتىڭ كەڭەيتىلگەن وتىرىسىندا.
وسى ورايدا ەلباسى جەر تەلىمىنە نەگىزگى سۇرانىس استانا، الماتى، شىمكەنت، اقتوبە سەكىلدى ۇلكەن قالالاردىڭ توڭىرەگىندە ەكەنىن اتاپ ءوتتى.
سوندىقتان دا زاڭنامالىق تۇردە اكىمدەرگە بۇل جەرلەردى قايتارىپ الۋعا مۇمكىندىك بەرۋ ۇسىنىلدى. ەگەر دە زاڭ بويىنشا پايدانىلماسا، وندا پروكۋراتۋرامەن بىرگە مەملەكەتكە قايتارۋ كەرەكتىگى نەمەسە كاداسترلىق قۇنمەن ساتىپ الۋ باعىتى اتاپ ءوتىلدى.
«بۇل رەتتە ەسكەرۋ جاسالدى. جەردى العان كەزدە فەرما، ءۇي سالاتىندارىن ايتقان ەدى، ءبىراق نىساندار تۇرعىزىلمادى. ۋاقىت كەلدى، جەردى مەملەكەتكە قايتارۋ كەرەك جانە وسى شارالاردى ۇزاققا سوزباۋ كەرەك. بۇل تۇرعىدا اكىمدە ادامدارعا وزدەرىنىڭ باسپاناسىن سالۋ ءۇشىن جەر تەلىمىن بەرۋگە مۇمكىندىك بولادى»، - دەپ اتاپ ءوتتى ن. نازاربايەۆ.
مەملەكەت باسشىسى بۇل باعىتتاعى قادامدار جاسالسا، قارقىندى قۇرىلىس بولاتىنىن جەتكىزدى.
«سوندىقتان ۇلكەن قالالاردىڭ توڭىرەگىندە جەكەمەنشىك ۇيلەردىڭ كوبەيگەنىنىڭ ەشقانداي جامانشىلىعى جوق. ءبىراق، ساۋلەتتىك تۇرعىدا جوبا بويىنشا دۇرىس ءۇي بولۋى كەرەك»، - دەدى پرەزيدەنت.
اۆتور: رۋسلان عابباسوۆ
