حالىققا جاسايتىن ەڭ باستى جاقسىلىعىمىز - جۇمىسپەن قامتاماسىز ەتۋ - نازاربايەۆ
بۇگىن اقوردادا ءوتىپ جاتقان ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ وسىلاي دەدى.
مەملەكەت باسشىسى ءوز سوزىندە جاپپاي كاسىپكەرلىكتى ىنتالاندىرۋ جانە جۇمىسپەن قامتاماسىز ەتۋ» جايىنا باسا كوڭىل اۋداردى. «اقپارات قۇرالدارىندا دا جاريالاندى. مەن ءاربىر وبلىسقا بارعانىمدا ەڭ ءبىرىنشى ماعان جاسايتىن بايانداما قانشا جۇمىس ورنى قۇرىلعاندىعى جايىندا بولۋى كەرەك. ءار اۋدان مەن اۋىلداردىڭ اراسىندا كىم قانشا جۇمىس ورنىن قۇرعاندىعى جونىنەن باسەكە بولۋى كەرەك. ءبىزدىڭ حالىقا جاسايتىن ەڭ جاقسىلىعىمىز سول. باسقاسىن ءوز قولىمەن جۇمىس ىستەپ، قاراجاتىن تاۋىپ، بالا- شاعاسىن اسىراۋى كەرەك»، - دەپ اتاپ ءوتتى ق ر پرەزيدەنتى.
وسى رەتتە مەملەكەت باسشىسى جاپپاي كاسىپكەرلىكتى دامىتۋ ماسەلەسى ەڭ نەگىزگى باسىمدىقتىڭ ءبىرى بولىپ قالا بەرەتىندىگىن باسا ايتتى.
«6 جىلدان استام ۋاقىتتان بەرى «بيزنەستىڭ جول كارتاسى-2020» باعدارلاماسى جۇمىس ىستەپ تۇر. مۇنى بىلەسىزدەر. ونىڭ اياسىندا ونداعان مىڭ شاعىن جانە ورتا بيزنەس 270 ميلليارد تەڭگە سوماسىنا قولداۋعا يە بولدى. كەلەسى باعدارلاما - «جۇمىسپەن قامتۋدىڭ جول كارتاسى» جۇزەگە اسىرىلۋدا. 5 -جىلدىڭ ىشىندە وعان 450 ميلليارد تەڭگە، ونىڭ ىشىندە اعىمداعى جىلدا عانا 218 ميلليارد تەڭگە ءبولىندى»، - دەدى ن. نازاربايەۆ.
ق ر پرەزيدەنتىنىڭ مالىمەتتەرىنشە، بۇگىنگى كۇنى اتالعان باعدارلامالاردىڭ ارقاسىندا 722 مىڭ ادام جۇمىسقا ورنالاسسا، ونىڭ ىشىندە 518 مىڭ ادام تۇراقتى جۇمىس تاپتى.
«بىزگە بۇل باعدارلامالاردى ودان ارى دامىتۋ، قولداۋ تەتىكتەرىن جەتىلدىرۋ قاجەت»، - دەدى مەملەكەت باسشىسى.
اۆتور: مارلان جيەمباي
