ۇكىمەتتىڭ جاڭا قۇرامى جاقىن كۇندەرى قالىپتاستىرىلادى - ەلباسى

استانا. قازاقپارات - جاقىن كۇندەرى ۇكىمەتتىڭ جاڭا قۇرامى قالىپتاستىرىلادى.

بۇل تۋرالى بۇگىن ۇكىمەتتىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازاربايەۆ ءمالىم ەتتى.

«بۇگىن تاپسىرمالاردى بەردىم. وسى رەتتە استاناعا كەلگەن ءوڭىر اكىمدەرى ءتيىستى كەزدەسۋلەردى وتكىزىڭدەر. بۇگىن- ەرتەڭ، تاياۋ ارادا ۇكىمەتتىڭ قۇرامى قالىپتاستىرىلىپ، تاعايىندالاتىن بولادى، ياعني جۇمىسقا كىرىسەدى. ەلىمىزگە، حالقىمىز ءۇشىن بىرىگىپ جۇمىس ىستەيىك! بارلىقتارىڭىزعا ساتتىلىك تىلەيمىن!»، - دەدى پرەزيدەنت.

بۇدان بۇرىن حابارلانعانداي، ەلباسى نۇرسۇلتان نازاربايەۆ قازىرگى ۋاقىتتا وتستاۆكاداعى ۇكىمەتتە ايتا قويارلىقتاي وزگەرىستەر بولمايتىنىن ايتقان بولاتىن.

«ۇكىمەتتە جالپى وزگەرىستەردىڭ بولىپ جاتقانىن ەستىپ، ءبىلىپ وتىرسىزدار. ونىڭ وزىندىك لوگيكاسى بار. بۇل - بىرىنشىدەن. ەكىنشىدەن - قاۋىپسىزدىك ماسەلەسىن كۇشەيتۋ، نىعايتۋ ماسەلەسى دە بار. سودان كەيىن مەن كارىم ءماسىموۆتى ءوزىنىڭ كەلىسىمى بويىنشا قاجەتتى جەرگە تاعايىندادىم. تاجىريبەسى بار. رەسپۋبليكانىڭ جاعدايىن بىلەدى دەپ تاعايىندادىم. پرەمەر-ءمينيستردى قىزمەتىنەن بوساتۋىما بايلانىستى قازىر ۇكىمەت وتستاۆكادا. كوپ سوزباي ءبارىن شەشەتىن بولامىز. جاڭا باسشىلاردى دا، جاڭا مينيسترلەردى دە. ونشا كوپ وزگەرىستەر بولا قويماس دەپ ويلايمىن. سەبەبى ۇكىمەت قيىن-قىستاۋ جاعدايدا جۇكتەلگەن تاپسىرمانى ورىنداپ جاتىر»، - دەدى ن. نازاربايەۆ.

اۆتور: رۋسلان عابباسوۆ