ەلباسى ۇكىمەتكە بيۋدجەتتى ناقتىلاۋدى جۇكتەدى

استانا. قازاقپارات - مەملەكەت باسشىسى نۇرسۇلتان نازاربايەۆ ۇكىمەتكە بيۋدجەتتى ناقتىلاۋدى تاپسىردى.

«اتاپ وتكەندەردى ورىنداۋ تۇرعىسىندا ۇكىمەتكە اعىمداعى جىلعا رەسپۋبليكالىق بيۋدجەتكە ناقتىلاۋ جۇرگىزۋدى جانە ونى پارلامەنتكە ۇسىنۋدى تاپسىرامىن»، - دەدى پرەزيدەنت اقورداداعى ۇكىمەتتىڭ كەڭەيتىلگەن وتىرىسىندا.

وسى رەتتە جۇكتەلگەن تاپسىرمالاردى جۇزەگە اسىرۋعا، باسىمدىقتى جوبالار مەن شارالار ءۇشىن قوسىمشا 380 ميلليارد تەڭگە ءبولۋ قاجەتتىگىن اتاپ ءوتتى.

«ونىڭ ىشىندە 280 ميلليارد تەڭگە بۇگىن اتاپ وتكەن شارالاردى ىسكە اسىرۋعا جانە 100 ميلليارد تەڭگە قاۋىپسىزدىكتى قامتاماسىز ەتۋگە، ءبىلىم بەرۋ نىساندارى مەن ينفراقۇرىلىم قۇرىلىسىنا باعىتتالعان وزگە دە شىعىستارعا قاراستىرىلۋى كەرەك»، - دەدى ن. نازاربايەۆ.

بۇل تۇرعىداعى جۇمىستارعا پرەزيدەنت ءتيىستى قارجى بار ەكەنىن ايتا كەلە، بارشا اكىمدەرگە ءبىرىنشى كۇننەن باستاپ قارجىنى ماقساتتى ءارى ءتيىمدى جۇمساۋعا تاپسىردى.

اۆتور: رۋسلان عابباسوۆ