مۇحامەدي ۇلى ەل تاريحىنداعى تۇڭعىش پاراليمپيادا چەمپيونى ءزۇلفيا گابيدۋللينانى جەڭىسىمەن قۇتتىقتادى

استانا. قازاقپارات - بۇگىنگى تاڭ بارشا قازاق ەلى ءۇشىن قۋانتاتىن جاڭالىق الىپ كەلدى.

التى دۇركىن الەم چەمپيونى ءزۇلفيا گابيدۋللينا قازاقستان قورجىنىنا پاراليمپيادا ويىندارىنىڭ العاشقى التىن جۇلدەسىن سالدى.

ق ر مادەنيەت جانە سپورت ءمينيسترى ارىستانبەك مۇحامەدي ۇلى ەل ابىرويىن اسقاقتاتقان ءجۇزۋشىنى جەڭىسىمەن قۇتتىقتادى.

«قۇرمەتتى ءزۇلفيا راۋحات قىزى، ءسىزدى XV پاراليمپيادا ويىندارىندا ەل مەرەيىن ۇستەم ەتىپ قازاقستان قۇراماسىنىڭ قورجىنىنا سالعان العاشقى التىن مەدالىڭىزبەن شىن جۇرەكتەن قۇتتىقتايمىن! بۇل جەڭىسىڭىز ءسىزدىڭ كۇشىڭىز بەن شەبەرلىگىڭىزگە سەنگەن ەلىمىزدىڭ ميلليونداعان ازاماتتارى ءۇشىن قۋانىشتى ءسات بولدى»، - دەپ جازدى مينيستر ءوز قۇتتىقتاۋ حاتىندا.

سونىمەن قاتار سپورت سالاسىنداعى مەملەكەتتىك ورگاننىڭ باسشىسى سپورتشىمىزدىڭ بۇل جەڭىسى ەل تاريحىندا التىن ءىز قالدىراتىندىعىن ايتىپ كەتتى: «ءسىزدىڭ بۇل جەتىستىگىڭىز قازاقستاننىڭ جۇزۋدەن العاشقى جەڭىسى رەتىندە تاۋەلسىز وتانىمىزدىڭ تاريحىندا التىن ارىپتەرمەن جازىلارى حاق. بۇكىل الەم حالقىنىڭ الدىندا قازاق قىزىنا ءتان قايسار مىنەز كورسەتىپ، شىنايى مىقتىلىعىڭىزدى مويىنداتتىڭىز. ال، ءبىز، بارشا وتانداستارىڭىز، ءسىز سياقتى باتىل، ەرجۇرەك قارىنداستارىمىزدىڭ ارقاسىندا شىنايى ماقتانىش سەزىمىنە بولەندىك».

ءزۇلفيا گابيدۋللينا ريو-دە-جانەيرودا ءوتىپ جاتقان جازعى پاراليمپيادا ويىندارىندا 100 مەتر قاشىقتىققا ەركىن جۇزۋدە جاڭا الەم رەكوردىن ورناتىپ، جەڭىمپاز اتاندى، دەپ حابارلايدى ق ر م س م باسپا ءسوز قىزمەتى.