ۇلتتىق مۋزەيدە يسپانياداعى ازاماتتىق سوعىس تۋرالى كورمە اشىلدى - فوتو

استانا. قازاقپارات - قازاقستان رەسپۋبليكاسى ۇلتتىق مۋزەيىندە «سوعىس بالالارى» اتتى كورمەنىڭ اشىلۋ سالتاناتى ءوتتى.

بۇل كورمەنى ۇلتتىق مۋزەي قازاقستانداعى يسپانيا ەلشىلىگىمەن بىرلەسىپ ۇيىمداستىرىپ وتىر، دەپ حابارلادى ق ر مادەنيەت جانە سپورت مينيسترلىگىنىڭ باسپا ءسوز قىزمەتى.

كورمە يسپانيانىڭ وتكەن عاسىرداعى قايعىلى وقيعالارىن، ونداعى ازاماتتىق سوعىستى كورسەتۋگە جانە يسپان بالالارى مەن ولاردىڭ شيەلەنىستى تاعدىرىنا ارنالعان. 1936-جىلدىڭ ەكىنشى جارتىسىندا يسپانيانىڭ كاستيليا جانە اندالۋسياداعى قالالارىنان كەڭەس وداعىنا 3000 داي يسپاندىق بالا كوشىرىلىپ، ولارعا ارنالىپ 15 بالالار ءۇيى اشىلعان. كورمەدە نەگىزىنەن وسى بالالاردىڭ باسىنان وتكەن وقيعالاردى بەينەلەيتىن سۋرەتتەر جانە قۇجاتتار قويىلدى.

جيىندا ءسوز العان ۇلتتىق مۋزەي ديرەكتورى دارحان مىڭباي كەلۋشىلەردى كورمەنىڭ اشىلۋىمەن قۇتتىقتادى. «بۇگىنگى كورمەنىڭ تاريحي ءمانى بولەك. ەستەرىڭىزدە بولسا، ءبىز بۇعان دەيىن دە الەمدەگى ادامزات ومىرىنە قاتتى اسەر ەتكەن تاريحقا كوڭىل ءبولىپ كەلەمىز. حالوكوست قۇرباندارىن ەسكە الۋ كۇنىنە بايلانىستى ۇلكەن شارا دا وسى مۋزەيدە وتكەن بولاتىن. ودان كەيىن ءبىزدىڭ ءوزىمىزدىڭ رەپرەسسيا قۇرباندارىن ەسكە ءتۇسىرۋ كۇنىنە ارنالعان ۇلكەن كورمەلەر بولدى. ال ەندى بۇگىنگى كورمە ءبىزدىڭ يسپانيا ەلشىلىگىمەن بىرگە جاساپ جاتقان العاشقى شارامىز. بۇل ەكى ەلدىڭ اراسىنداعى تىعىز بايلانىستىڭ ارقاسىندا دۇنيەگە كەلگەن ءىس-شارا»، - دەدى د. مىڭباي.

كورمەنىڭ اشىلۋ سالتاناتىنا ارنايى كەلگەن يسپانيا كورولدىگىنىڭ قازاقستانداعى توتەنشە جانە وكىلەتتى ەلشىسى پەدرو حوسە سانس سەررانو مىرزا ەلشىلىك اتىنان قازاقستان رەسپۋبليكاسىنىڭ ۇلتتىق مۋزەيىنە العىس ءبىلدىردى. «يسپانيادا 1934-1939-جىلدار ارالىعىندا بولعان ازامات سوعىسى بارشا يسپاندىقتاردىڭ تاعدىرىنا كەرى اسەرىن تيگىزدى. سول كەزدە شامامەن 2900 دەي بالا كەڭەس وداعىنا كوشىرىلگەن بولاتىن. ول بالالار 5 پەن 12 جاس ارالىعىندا بولعان. كەڭەس وداعى ولاردى جىلى قابىلداپ، باسپانامەن، كيىممەن، ازىق- تۇلىكپەن قامتاماسىز ەتتى. مەديتسينالىق قىزمەت كورسەتىپ، ساپالى ءبىلىم دە بەردى»، - دەپ تاريحقا شەگىنىس جاسادى. جانە دە ۇلتتىق مۋزەيمەن بىرگە جۇمىس جاساپ جاتقانىنا قۋانىشتى ەكەنىن جەتكىزدى.

اتالمىش كورمەنىڭ تۇپكى ماقساتى - كىشكەنتاي كەزدەرىنەن-اق سوعىستىڭ سۇراپىل زاردابىن كورۋگە ءماجبۇر بولعان بالالاردى قۇرمەتپەن ەسكە الۋ. يسپاندىق بالالاردىڭ قيىندىققا تولى تاعدىرىنا ارنالعان كورمە 8- قازانعا دەيىن جالعاسادى.