جاڭا الىپپە تاريحىنان ءبىر ۇزىك

استانا. قازاقپارات - ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۇراجايىندا الماتى قالاسىنداعى «عىلىم ورداسى» رەسپۋبليكالىق مەملەكەتتىك كاسىپورنىنا قاراستى

سيرەك كەزدەسەتىن كىتاپتار مۋزەيىنىڭ «جاڭا الىپپە تاريحىنان ءبىر ۇزىك» اتتى كورمەسى اشىلدى، دەپ حابارلادى ق ر مادەنيەت جانە سپورت مينيسترلىگىنىڭ باسپا ءسوز قىزمەتى.

شارانىڭ سالتاناتتى ءبولىمى اباي قورىق-مۇراجايىنىڭ ديرەكتورى ب. جۇنىسبەك ۇلىنىڭ العىسوزىمەن باستالدى. سيرەك كەزدەسەتىن كىتاپتار مۋزەيىنىڭ مەڭگەرۋشىسى ءا. سەيپىش ۇلى ءوز سوزىندە كورمەنىڭ ەرەكشەلىكتەرىنە توقتالىپ، مۋزەيارالىق بايلانىستىڭ نىعايا تۇسەتىنىنە سەنىم ءبىلدىردى.

اتالمىش مۋزەيدىڭ عىلىمي قىزمەتكەرى ن. اسىلبەك ۇلى كورمەنىڭ اشىلۋ سالتاناتىنا كەلگەن قوناقتاردى كورمە ەكسپوزيتسياسىمەن تانىستىرىپ، قازاق جازۋىنىڭ تاريحىنان مول ماعلۇمات بەردى.

كورمە ەكسپوزيتسياسىنا قوعامدىق-تاريحي ماڭىزى زور XX عاسىردىڭ 20-40 -جىلدار ارالىعىنداعى لاتىن گرافيكاسىندا جارىق كورگەن باسپا مۇرالار تاڭداپ الىنىپ، كورەرمەندەر نازارىنا ۇسىنىلعان ەدى. وسى باسىلىمداردىڭ ىشىندە اباي قۇنانباي ۇلىنىڭ تۇڭعىش تولىق جيناعى، س. سەيفۋللين، ءى. جانسۇگىروۆ شىعارمالارىنىڭ قازىرگى كۇنى وتە سيرەك كەزدەسەتىن كىتاپتارى، ك س ر و كونستيتۋتسياسىنىڭ 1937-جىلعى نۇسقاسى، ج. جابايەۆ شىعارمالارى كورەرمەندەر تاراپىنان ۇلكەن قىزىعۋشىلىققا يە بولدى.

كونەدەن باستاۋ العان وتاندىق جازبا مادەنيەتتى ناسيحاتتايتىن ءىرى مادەني جانە عىلىمي ورتالىعىنىڭ لاتىن گرافيكاسىنداعى وتاندىق باسپا ءىسى تاريحىنان سىر شەرتەتىن كورمەسىن سەمەي قالاسىنىڭ تۇرعىندارى مەن قالا قوناقتارى ءبىر اي بويى تاماشالاي الادى.