قازاقستان كوشپەندىلەردىڭ بۇكىل الەمدىك ويىندارىندا ءۇشىنشى ورىن الدى

استانا. قازاقپارات - قىرعىزستان كومانداسى كوشپەندىلەردىڭ بۇكىل الەمدىك ويىندارىندا مەدالدار سانى بويىنشا كوش باستاپ، ءبىرىنشى ورىن الدى.

ەكىنشى ورىن تۇركىمەنستان السا، ءۇشىنشى ورىنعا قازاقستان كومانداسى قول جەتكىزدى، دەپ جازادى ر ي ا نوۆوستي.

كوشپەندىلەردىڭ بۇكىل الەمدىك ويىندارى قىرعىزستاندا ىستىقكول جاعاسىندا 3-8- قىركۇيەك ارالىعىندا ءوتتى. جارىسقا سپورتتىڭ 25 ءتۇرى بويىنشا الەمنىڭ 60 تان اسا مەملەكەتى قاتىستى.

ويىن اياسىندا ىستىقكول وبلىسى كىرچىن جايلاۋىندا «دۇنيە ءجۇزى كوشپەندىلەرى» ەتنوفەستيۆالى ءوتتى.

«مەدال سانى بويىنشا ءبىرىنشى ورىندى قىرعىزستان قۇراماسى الدى. ولاردا بارلىعى 79 مەدال، ونىڭ 25 ءى التىن. ەكىنشى ورىنعا 15 التىن مەدال العان تۇركىمەنستان يە بولدى. ال قازاقستان 12 التىن مەدال ۇتىپ الىپ، ءۇشىنشى ورىن يەلەندى»، - دەپ جازىلعان حابارلامادا.

رەسەي كومانداسى 4-ورىن السا، ودان كەيىنگى ورىندارعا ازەربايجان مەن يران جايعاستى. سپورتتىڭ ءار ءتۇرى بويىنشا مەدالدى 30 ەلدىڭ سپورتشىلارى يەلەندى.

مەملەكەتتىك اگەنتتىك ديرەكتورى قانات امانقۇلوۆتىڭ ايتۋىنشا، كوشپەندىلەردىڭ بۇكىل الەمدىك ويىندارىندا الەمنىڭ 62 مەملەكەتىنەن 1000 سپورتشى قاتىسقان. ولارعا جەرگىلىكتى تورەشىلەرمەن بىرگە 60 تان اسا شەتەلدىك تورەشىلەر قىزمەت كورسەتتى.