سەنات ءماسىموۆتىڭ ۇلتتىق قاۋىپسىزدىك كوميتەتى ءتوراعاسى قىزمەتىنە تاعايىندالۋىنا كەلىسىم بەردى

استانا. قازاقپارات - ق ر پارلامەنتى سەناتىنىڭ جالپى وتىرىسىندا دەپۋتاتتار كارىم ءماسىموۆتى ۇلتتىق قاۋىپسىزدىك كوميتەتى ءتوراعاسى لاۋازىمىنا تاعايىنداۋعا كەلىسىم بەردى.

ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ مەملەكەت باسشىسىنىڭ سەناتقا ك. ءماسىموۆتى ۇ ق ك ءتوراعاسى لاۋازىمىنا تاعايىنداۋعا كەلىسىم بەرۋ تۋرالى ءوتىنىشىن وقىپ بەردى.

اشىق داۋىس بەرۋ بارىسىندا 39 سەناتوردىڭ بارلىعى دا ءبىر اۋىزدان ونىڭ كانديداتۋراسىن قولدادى.

ەستەرىڭىزگە سالا كەتەيىك، بۇگىن ق ر پرەزيدەنتىنىڭ «ك. ق. ءماسىموۆتى قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى قىزمەتىنە تاعايىنداۋ جانە قازاقستان رەسپۋبليكاسىنىڭ ۇكىمەتى تۋرالى» جارلىعى جاريالانعان بولاتىن.

«كارىم قاجىمقان ۇلى ءماسىموۆ قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالسىن، ول قازاقستان رەسپۋبليكاسىنىڭ پرەمەر- ءمينيسترى قىزمەتىنەن بوساتىلسىن. قازاقستان رەسپۋبليكاسىنىڭ ۇكىمەتى قازاقستان رەسپۋبليكاسى ۇكىمەتىنىڭ جاڭا قۇرامى بەكىتىلگەنگە دەيىن ءوز مىندەتتەرىن اتقاراتىن بولسىن. قازاقستان رەسپۋبليكاسى پرەمەر- ءمينيسترىنىڭ مىندەتتەرىن ۋاقىتشا اتقارۋ قازاقستان رەسپۋبليكاسى پرەمەر- ءمينيسترىنىڭ ءبىرىنشى ورىنباسارى باقىتجان ءابدىر ۇلى ساعىنتايەۆقا جۇكتەلسىن»، - دەلىنگەن جارلىقتا.

 اۆتور: مارلان جيەمباي