ريو وليمپياداسىنىڭ قولا جۇلدەگەرى قىزدار ۋنيۆەرسيتەتىندە تەگىن ءبىلىم الادى

استانا. قازاقپارات - قازاق مەملەكەتتىك قىزدار پەداگوگيكالىق ۋنيۆەرسيتەتىندە وقۋ ورنىنىڭ تۇلەگى، ريو وليمپياداسىنىڭ قولا جۇلدەگەرى كارينا گوريچيەۆاعا قۇرمەت كورسەتىلدى.

«وقۋ جىلىن ريودا وتكەن وليمپيادا ويىندارىندا ءبىزدىڭ سپورتشىمىزدىڭ جارقىن جەڭىسكە جەتۋىمەن باستاۋىمىز تاماشا وقيعا. وسى جولعى وليمپياداعا ءبىزدىڭ ەكى سپورتشىمىز، كارينا گوريچيەۆا مەن مارگاريتا ەليسەيەۆا قاتىستى. كارينانىڭ جەڭىسى بۇل ءبىزدىڭ ۋنيۆەرسيتەتىمىز ءۇشىن، بارشا قازاقستان ءۇشىن جەڭىس. ەلباسى سپورتشىلارىمىزدىڭ ەڭبەگىن باعالاپ، ماراپاتتادى. ونىڭ ىشىندە كارينا دا «قۇرمەت» وردەنىن الدى»، - دەپ اتاپ ءوتتى ۋنيۆەرسيتەت رەكتورى دينار نوكەتايەۆا.

سونىمەن قاتار ول بۇكىل ۇجىم اتىنان كارينانى 2016-جىلعى جازعى وليمپيادا ويىندارىنداعى تاماشا جەڭىسىمەن دە قۇتتىقتادى.

«ءبىزدىڭ ۋنيۆەرسيتەتىمىزدەن العان ءبىلىمىڭدى، تاباندىلىعىڭ مەن زور ەڭبەكقورلىعىڭدى ۇشتاستىرا وتىرىپ، سەن وسىنداي بيىكتى باعىندىردىڭ. سەنىڭ ءاربىر جەڭىسىڭ بۇل ءبىزدىڭ ۋنيۆەرسيتەتتىڭ، ۇجىمنىڭ، ۇستازداردىڭ، باپكەرلەر مەن جاتتىقتىرۋشىلاردىڭ تابىسى. ەندى «التىن» مەدالعا قول جەتكىزۋىڭە تىلەكتەسپىز»، - دەدى د. نوكەتايەۆا.

رەكتور ۋنيۆەرسيتەت مايا مانەزا، كارينا گوريچيەۆا جانە مارگاريتا ەليسەيەۆا سىندى اۋىر اتلەتتەردى دايىنداپ، قىزدار سپورتىن دامىتۋدا كوشباسشىعا اينالعانىن باسا ايتتى. سونداي-اق سالتاناتتى جاعدايدا كاريناعا ۋنيۆەرسيتەتتە تەگىن ءبىلىم الۋعا مۇمكىندىك بەرەتىن سەرتيفيكات تابىستادى.

ايتا كەتەرلىگى، كارينا قازاق مەملەكەتتىك قىزدار پەداگوگيكالىق ۋنيۆەرسيتەتىندە ەكىنشى جوعارى ءبىلىم الۋ ءۇشىن قۇجات تاپسىرعان.

اۆتور: مارلان جيەمباي