قازاقستاندا تەرروريزم بابىمەن سوتتالعانداردىڭ مۇلكىن مىندەتتى تۇردە تاركىلەۋ ەنگىزىلەدى
بۇل تۋرالى بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزم جانە تەرروريزم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ق ر ۇلتتىق كوميتەتى ءتوراعاسىنىڭ ورىنباسارى مارات قولقوبايەۆ ءمالىم ەتتى.
«زاڭ جوباسىمەن بەس كودەكس پەن 19 زاڭعا وزگەرىستەر ەنگىزىلمەك. اتاپ ايتقاندا، قىلمىستىق كودەكستىڭ تەرروريستىك باپتارى بويىنشا تەرروريستىك قىلمىستار ءۇشىن جازالار كۇشەيتىلەدى. بۇدان بولەك، ەكسترەميزم مەن تەرروريزم بابىمەن سوتتالعانداردىڭ مۇلكىن مىندەتتى تۇردە تاركىلەۋ قاراستىرىلىپ وتىر. تەرروريستىك قىلمىستاردىڭ ازاماتتارىمىز بەن مەملەكەتكە قاۋىپىنىڭ ارتىپ وتىرۋىنا بايلانىستى مۇنداي نورما ەنگىزۋ قاجەتتى شارالاردىڭ ءبىرى بولىپ تابىلادى»، - دەدى م. قولقوبايەۆ.
ونىڭ ايتۋىنا قاراعاندا، قىلمىستىق-پروتسەسسۋالدىق كودەكستە قارۋ-جاراقتىڭ زاڭسىز اينالىمى، زاڭسىز كوشى-قون جانە ەسىرتكى بيزنەسى سالاسىنداعى قىلمىستار بويىنشا ۇلتتىق قاۋىپسىزدىك ورگاندارى ءۇشىن بالاما تەرگەۋلەر ەنگىزۋ قاراستىرىلادى. بۇنداي شارا نەگىزىنەن ەسىرتكىنىڭ، قارۋ-جاراقتىڭ زاڭسىز اينالىمى تەرروريزمدى قارجىلاندىرۋدىڭ نەگىزگى كوزى بولىپ تابىلاتىندىقتان ەنگىزىلىپ وتىر.
«بۇدان بولەك، تىركەۋسىز جەكە تۇلعالاردى تۇرعىزعانى ءۇشىن تۇرعىن ءۇي يەلەرىنە، اتىس تيرلەرىن اشۋ مەن ونىڭ قىزمەتىنە قاتىستى زاڭنامانى بۇزعاندارعا، جەكە كۇزەت ۇيىمدارىنىڭ ارنايى كۇزەت كيىم فورماسىن زاڭسىز كيىپ جۇرگەنى ءۇشىن اكىمشىلىك جاۋاپكەرشىلىكتەر ەنگىزۋ كوزدەلەدى. قارۋ-جاراقتىڭ جەكەلەگەن تۇرلەرىنە مەملەكەتتىك باقىلاۋ كۇشەيتىلەدى. قارۋجاراقتىڭ اينالىمى مەن ونى ساقتاۋعا، سونىمەن قاتار، وسى سالادا قىزمەت كورسەتەتىن كاسىپكەرلىك سۋبەكتىلەرىنە تالاپ كۇشەيتىلەدى. قارۋجاراق دۇكەندەرىنىڭ ورنالاسۋ تالاپتارى قاتايتىلىپ، اتۋعا دايىن جاعدايداعى، وقتالىپ تۇرعان قارۋلاردى ساتۋعا تىيىم سالىنادى»، - دەدى ۇ ق ك وكىلى.
بۇنىمەن قوسا، زاڭ جوباسىمەن كۇزەت ۇيىمدارىنا قاتىستى تالاپ تا كۇشەيتىلەدى. اتاپ ايتقاندا، كۇزەت قىزمەتىنە قابىلداناتىن تۇلعالارعا قاتىستى ەرەكشە تالاپتار ناقتىلانادى. بۇل رەتتە كۇزەت فيرمالارىنىڭ قىزمەتكەرلەرىنە قارۋ-جاراقتار، وق دارىلەر مەن جارىلعىش زاتتارى بار كۇزەتىلەتىن نىساندارداعى دابىلداردىڭ ىسكە قوسىلۋىنا قاتىستى ىشكى ىستەر ورگانىنا جەدەل حابارلاۋ تۋرالى مىندەتتەر جۇكتەلەدى.
سونىمەن قاتار، ەكسترەميزم مەن تەرروريزمگە ىقپال ەتەتىن ءدىني توپتار مەن بىرلەستىكتەردىڭ ءىس ارەكەتىنە تىيىم سالۋ كوزدەلىپ وتىر.
ەسكە سالا كەتەيىك، زاڭ جوباسى مەملەكەت باسشىسىنىڭ قازاقستان رەسپۋبليكاسى قاۋىپسىزدىك كەڭەسىنىڭ وتىرىسىندا بەرگەن تاپسىرمالارىن ورىنداۋ ماقساتىندا ازىرلەنگەن.
اۆتور: قانات مامەتقازى ۇلى
