بايان ەسەنتايەۆا اتى- شۋلى وقيعانىڭ قالاي بولعانىن ايتىپ بەردى

  استانا. قازاقپارات - بايان ەسەنتايەۆا جۋرناليست دينارا ءساتجانعا سۇحبات بەرىپ، اتى- شۋلى وقيعانىڭ قالاي بولعانىن ايتىپ بەردى.

«ءدال سول كۇن مەنىڭ ومىرىمدەگى ەڭ اۋىر كۇن. 10 - ماۋسىم كۇنى بولعان جاعداي ءالى كوز الدىمدا. ول قورقىنىش مەنى ءالى دە اڭدىپ تۇرعانداي. مەن ءالى دە كۇيزەلىستى باستان كەشۋدەمىن. ءتىپتى، ماعان 5 مەتر جاقىنداعان ەر ادامنان قاتتى قورقام. ماعان وڭايعا سوققان جوق، ارينە. ءبىراق، مەن مۇنىڭ ءبارىن جەڭۋ كەرەك ەكەنىن بىلەم»، - دەيدى ەسەنتايەۆا.

«بۇل سۇحباتتى بەرمەيتىن دە ەدىم. ءبىراق مەن تۋرالى نەبىر اقپارات جازىلىپ جاتىر. مەن ادامگەرشىلىكپەن بارلىعىنان مەن تۋرالى جازۋدى دوعارۋىن سۇراعان ەدىم. مەن جايىندا ويدان شىعارىپ جازىلىپ تا جاتىر. سوندىقتان بارلىعىن ءوز اۋزىممەن ايتۋدى ءجون كوردىم»، - دەپ باستادى ول ءسوزىن.

وسىدان سوڭ قايعىلى وقيعانىڭ قالاي بولعانىن ءوز اۋزىمەن ايتىپ بەردى.

«مەن 5 - ماۋسىم كۇنى ۇيىمە قايتۋىم كەرەك بولعان. الايدا، كۇيەۋىم ەكەۋمىزدىڭ ارامىزدا داۋ تۋىنداپ، ول مەنىڭ ۇيگە كەلمەۋىمدى ايتىپ قورقىتتى. مەن تاعى 5 كۇن كۇتتىم. ول ساباسىنا تۇسكەن شىعار دەپ ويلادىم. سوسىن وعان ايتپاي ۇشىپ كەلدىم. تاكسيگە وتىرعاندا ول ەسىكتى اشىپ كىرىپ كەلدى. مەنىڭ سونداعى ونىڭ تۇرىنەن قورىققانىم سونشالىق، قازىردىڭ وزىندە كولىكتىڭ ەسىگىن اۆتوماتتى تۇردە جاۋىپ جۇرەم. ونىڭ قولىندا پىشاق بولدى. سوسىن ول مەنى جۇدىرىعىمەن ءبىر ۇردى»، دەپ ەسكە الادى بايان.

قايعىلى وقيعا جانىنا اۋىر باتقانىمەن بولعان جايدى سابىرلى كەيپىندە، ۇستامدىلىقپەن اڭگىمەسىن جالعاستىردى.

مەن جاي عانا جۇرگىزۋشىدەن كومەك سۇرادىم. سالدەن سوڭ ول جۇرگىزۋشىنى توقتاتىپ، مەنى سوڭىمىزدان كەلە جاتقان ەكىنشى كولىككە وتىرعىزدى. ول كولىك تىزگىنىندە ونىڭ ءىنىسى وتىردى. سودان مەنى سوققىنىڭ استىنا الۋى 2 ساعاتقا سوزىلدى. مەنىڭ باسى- كوزىمنەن، مۇرنىمنان، قۇلاعىمنان قان اعىپ جاتتى. ايقايلاۋعا دارمەنىم بولمادى. ەرنىمدى، بەتىمدى جىرىپ تاستادى. مۇرنىمدى سىندىردى. مەن سول كەزدە جاي عانا ونىڭ بالالارى جونىندە ويلاۋىن سۇرادىم. وسىدان سوڭ ول مەنى قاتتى ۇرىپ جىبەردى. سول سەبەپتى مەنىڭ ەكىنشى كوزىم دۇرىس كورمەيدى.»، - دەيدى پروديۋسەر.

 وسى ورايدا جورناليست ونىڭ بۇعان دەيىن كۇيەۋىنىڭ جاقسى ەكەنىن، ونىڭ جاقسى اكە ەكەنىن، وتباسىندا تاتۋ ەكەنىن ايتاتىنى جايىندا ءسوز قوزعادى.

«مەن بىرەۋگە شاعىم ايتقاندى ۇناتپايمىن. وتباسىڭداعى ۇرىستى ايتقاننان ەشنارسە وزگەرمەيدى. ول شىندىعىندا دا جاقسى كۇيەۋ، جاقسى اكە بولدى. ول مەنى جاقسى كوردى. ءبىراق ماسەلە مەنىڭ ونى جاقسى كورۋىم، كورمەۋىمدە. مەن وعان باۋىر باسقانىممەن ونى سۇيەم دەپ ەشكىمگە ايتپاعانمىن»، - دەيدى پروديۋسەر.