جۇمباق جاعدايدا جەرلەنگەندەر

استانا. قازاقپارات - پەتروپاۆل قالاسىنداعى «بەرەكە» جاڭا شاعىن اۋدانىنا جىلۋ جۇيەلەرىن تارتۋمەن شۇعىلداناتىن قۇرىلىسشىلار جەر قازۋ جۇمىستارى كەزىندە بىرنەشە ادامنىڭ ءمايىتىن كەزىكتىرىپ، ءتيىستى ورىندارعا حابارلاعان.

ءبىر تاڭقالارلىعى، وسىنداي وقىس وقيعا وسىمەن ەكىنشى مارتە قايتالانىپ وتىر. ونىڭ الدىندا دا وسى ماڭنان بىرنەشە ادامنىڭ دەنەسى تابىلعان، دەپ جازادى «ەگەمەن قازاقستان» گازەتى.

جەرگىلىكتى ولكەتانۋشىلار ءتارتىپ ساقشىلارىنىڭ ەسكى زيرات ورنى بولۋى مۇمكىن دەگەن بولجامىمەن ەش كەلىسكىسى جوق. ويتكەنى، ولار قالانىڭ ءۇش جەرىندە عانا ادامداردى جەرلەيتىن ارنايى قورىمنىڭ بولعانىن، كارتادا بەلگىلەنگەنىن العا تارسا، ءباز بىرەۋلەر وتكەن عاسىردىڭ اياعىندا بەنزوستروي اۋماعىندا بولعان كريمينالدىق توپتاردىڭ ءبىر-بىرىمەن اتىس-شابىسىن ەسكە سالادى. بۇل پىكىردى قيسىنسىز دەۋ قيىن. ويتكەنى، مايىتتەر جەردىڭ ۇستىڭگى قاباتىنا جاسىرىلعان. ەكىنشىدەن، جەرلەۋ سالتىنىڭ ەشقانداي ادەت-عۇرىپتارى بايقالماعان. سوعان قاراعاندا اسىعىس كومە سالىنعان سياقتى. ونىڭ ۇستىنە بۇل ماڭايدىڭ ادام اياعى تيمەگەن قامىستى، باتپاقتى جەر ەكەنىن ەسكەرسەك، كوڭىلدەگى كۇدىك قويۋلانا تۇسەرى انىق.

قازىر پەتروپاۆل قالالىق جەدەل-تەرگەۋ توبى زەرتتەۋ جۇمىستارىمەن اينالىسىپ، قاڭقا سۇيەكتەر ساراپتاماعا جىبەرىلدى. تۇپكىلىكتى قورىتىندى شىققاننان كەيىن عانا بارلىق ءمان-جاي بەلگىلى بولادى.