ستيۆەن سيگال: ەت - مەن جەگەن تاماقتاردىڭ ەڭ ءدامدىسى - فوتو
تانىمال ا ق ش اكتەرى ىستىقكول وبلىسىندا ءوتىپ جاتقان IIدۇنيەجۇزىلىك كوشپەندىلەر ويىندارىنا قادىرلى قوناق رەتىندە قاتىسىپ جاتىر.
«قىرعىز رەسپۋبليكاسىنىڭ پرەزيدەنتى المازبەك اتامبايەۆقا العىسىمدى بىلدىرەمىن. ول ازامات ماعان سىزدەردىڭ ەلدەرىڭىزبەن تانىسۋعا مۇمكىندىك بەردى. مەن قىرعىزستاندى ۇناتىپ قالدىم. بەسبارماق - مەن جەگەن تاماقتاردىڭ ەڭ ءدامدىسى. ءبىز پرەزيدەنتپەن فيلوسوفيالىق تاقىرىپتا سويلەستىك. وعان شەكسىز العىسىمدى بىلدىرەمىن!» ، - دەدى سيگال.
سونىمەن قاتار، امەريكالىق اكتەر بولاشاق جوسپارلارىمەن ءبولىستى.
«ءبىز سادىق شەر- نيازبەن الداعى ۋاقىتتا نە تۇسىرەتىنىمىز جايلى كەلىسسوز جۇرگىزىپ جاتىرمىز. بىزگە كەز- كەلگەن جاستاعى ادامدار قاجەت بولۋى مۇمكىن. ياعني، جاسى ۇلكەندەر دە، ەرەسەكتەر دە، جاستار دا كەرەك. ءوندىرىس بارىسىندا بۇلاردىڭ ءبارى بىزگە قاجەت بولادى» ، - دەدى ول.
الايدا الەمگە ايگىلى اكتەر ءارى رەجيسسەر سادىق بەيمەن بىرلەسكەن جوبالارىنىڭ اتاۋىن قۇپيا قالدىرۋدى ءجون سانادى. سونداي- اق، ستيۆەن سيگال جۋرناليستەرگە ايكيدودان قىرعىزستاننىڭ باس نۇسقاۋشىسى بولعانىن ايتتى. بۇل الەمنىڭ ءار تاراپىنان كەلگەن جۋرناليستەر ءۇشىن راسىندا ۇلكەن جاڭالىق بولدى. ال ءوزىنىڭ ۇنەمى كوشپەندىلەرگە بۇيرەگى بۇرىپ تۇراتىنىن تەگىنە تارتاتىنىمەن بايلانىستىردى.
"مەنىڭ اكەم - بۋريات، شەشەم - ءۇندىس. سوندىقتان مەنىڭ دە اتا- بابام كوشپەندى بولعان. ياعني، مەن دە ودان الىس بولماۋىم كەرەك. مەنىڭ ويىمشا، دۇنيەجۇزىلىك كوشپەندىلەر ويىندارىن وتكىزۋ وتە دۇرىس شەشىم دەپ سانايمىن. قالاي ءومىر ءسۇرۋ كەرەگىن ءتۇسىنۋ ءۇشىن، اۋەلى بىزگە قايدان شىققانىمىزدى ءبىلۋ قاجەت"، - دەپ تۇيىندەدى ءسوزىن اتاقتى گولليۆۋد اكتەرى.
ەستەرىڭىزگە سالا كەتەيىك، قىرعىزستاننىڭ چولپان اتا قالاسىندا دۇنيەجۇزىلىك كوشپەندىلەر ويىنى ءوتىپ جاتىر. جاھاندىق جارىسقا 58 دەن استام ەلدىڭ 600 گە تارتا سپورتشىسى قاتىسۋدا. ولار 25 سپورت تۇرىنەن باق سىنايدى. حالىقارالىق ىرگەلى شارا تۋرالى جاھاننىڭ 35 ەلىنەن كوپتەگەن بەلگىلى اقپارات قۇرالدارى حابار تاراتۋدا. ءدۇبىرلى دودادا قازاقستاننىڭ نامىسىن 75 سپورتشى قورعايدى.
ماتەريال اۆتورى: داۋرەن ەربولات
