قازاقستاندا كەلەر جىلى ءۇي باعاسى قىمباتتاۋى مۇمكىن
باسپاناعا سۇرانىس ايتارلىقتاي ازايعان. ءبىراق بۇل بۇقارانىڭ پاتەرگە قارىق بولعانىنان ەمەس. كەرىسىنشە قالتاسى كوتەرمەگەندىكتەن جىلجىمايتىن مۇلىك نارىعىنداعى ساۋدا-ساتتىق ەداۋىر سايابىرسىپتى.
باسپانانى بۇرىنعى باعامەن وتكىزە الماسىن بىلگەندەر ونى از-ماز ارزانداتقانداي بولعان. ايتسە دە مۇنىڭ ءوزى ساتىپ الۋشىلاردىڭ كوبەيۋىنە اسەر ەتپەي تۇر. ياعني، بۇرىنعى قارقىن قازىر جوق. ءتىپتى، تۇرعىن ءۇي قۇرىلىسىن جاقىندا اياقتاعان كومپانيالار دا تىعىرىققا تىرەلىپ، ۇيلەردى ءبولىپ تولەۋگە دەيىن جاعداي جاساپ جاتىر.
ازىرگە، ەل بويىنشا ەڭ ارزان ۇيلەر ورال قالاسىندا. ودان كەيىنگى ورىندى شىمكەنت باسقان. ساتىپ الۋشىلاردىڭ ازايعانىنان، ادەتتە ساۋدالاسۋعا كونبەيتىن، قۇنى كوك تىرەگەن استانا مەن الماتىدا ءۇي باعاسى ءسال ارزانداعان. سوڭعى ايداعى ساراپتاماعا سايكەس، شارشى مەتردىڭ ورتاشا باعاسى - 387 مىڭ 100 تەڭگە. ال ەڭ تومەنى - 278 مىڭ تەڭگە.
ارينە، سۇرانىستىڭ ازايعانى ەليتالىق ۇيلەرگە ەش اسەر ەتپەگەن. ولاردىڭ قۇنى سول قاتايعان كۇيى -شارشى مەترى جارتى ميللون تەڭگەگەدەن جوعارى ساتىلىپ جاتىر. «سايابىرسىپ قالعان جىلجىمايتىن مۇلىك ساۋداسى تەك كەلەسى جىلدىڭ باسىندا قوزعالۋى مۇمكىن» دەيدى استانالىق ريەلتورلار.
«استانادان ءۇي الام دەۋشىلەر بولسا، قازىر الۋى قاجەت. ويتكەنى، الدا «ەكسپو» بولايىن دەپ جاتىر. كوپتەگەن كومپانيالار قازىردىڭ وزىندە الماتىدان وسىندا كەلۋدە. ءىرى بانكتەر، باسقا دا كاسىپكەرلەر باس كەڭسەسىن استانادان اشۋدا. سوندىقتان باعا تۇراقتى كەزىندە مۇمكىندىكتى جىبەرىپ الماۋ كەرەك»، - دەيدى ساتۋ جونىندەگى مەنەدجەر ەرعازى مۇساتايەۆ.
