قاراقات قىدىرالىنىڭ وزىنە ءان ارناعانىن ايتىپ ماقتاندى

بىشكەك. قازاقپارات - جۇلدىزدى جۇپ قىدىرالى مەن قاراقات العاش رەت «اياۋلىم» انىنە بەينەبايان ءتۇسىرىپ، حالىقتىڭ جۇرەگىنەن ورىن العان ەدى.

كليپتەگى ءسابي بەكبولات بولماننىڭ ەسەيىپ، ەر جەتكەنىن ەسكەرسەك، بۇل تۋىندىنىڭ دا شىققانىنا ءبىرتالاي جىل بولعانىن اڭعارۋ قيىن ەمەس. وسى مەرزىم ىشىندە ەكەۋى ماحاببات جايىندا تالاي ءان ورىندادى. ال كەشە قاراقات قىدىرالىنىڭ وزىنە ءان ارناعانىن ايتىپ، ماقتاندى.

بۇل تۋرالى Stan.kz حابارلايدى.

«جىلاسام مەن جىلايىن، جىلاما سەن

قۇلاسام مەن قۇلايىن، قۇلاما سەن

ءدال وسى بولمىسىڭدى سۇيەم جانىم

بولساڭ دا بۇدان اسەم ۇناماس ەڭ...

قىدىرالىنىڭ ورىنداۋىنداعى ماعان ارنالعان ءان دەپ قويايىنشى»، - دەپ جازدى قاراقات جەلىدەگى پاراقشاسىندا.

جەلى قولدانۋشىلارى وتاندىق شوۋ-بيزنەستە ويىپ تۇرىپ ورنىن تاپقان جۇلدىزدى جۇپتىڭ ماحابباتىنا، ءبىر-بىرىنە دەگەن شەكسىز قۇرمەتىنە ءسۇيسىندى.

«قىدىر اعا سۇيىكتىسىن قالاي ەركەلەتسە دە جاراسادى. قاراقات تا سوعان لايىق. ايەلىڭىزدى ەركەلەتىپ، ماقتاعان سايىن، گۇل سياقتى قۇلپىرىپ وتىرادى»، «ۇلگى تۇتاتىن جۇپ»، «قاراقاتقا ريزامىن، ۇنەمى جولداسىنىڭ ەڭ جاقسى ەكەنىن ايتىپ وتىرادى»، «جۇپتارىڭىز ەشقاشان اجىراماسىن»، «قاراقات ەرىن سىيلاعان، قىدىر جارىن سىيلاعان قازاقتىڭ تەكتى ۇلى مەن قىزى ەكەنىنە كوزىم جەتەدى. سەبەبى 4 ۇلدى ومىرگە اكەلگەن انادان جاساندىلىق كورە المايمىن»، - دەپ جازعان جەلى قولدانۋشىلارى.

الايدا شىنايى سۇيەتىنىن جاريالاۋدى ابەستىك دەپ تاپقاندار دا كەزدەستى.

«ادام سونشا سۇيەتىندىگىن جارنامالاي بەرمەيدى، جاساندىلىق»، «قارعام دەگەنى ءبىرتۇرلى ەكەن»، - دەيدى وقىرماندار.