دەپۋتاتتار مەديتسينالىق وقۋ ورىندارىندا بالالار دارىگەرى ءبولىمىنىڭ جويىلۋىنا الاڭداۋشىلىق ءبىلدىردى
بۇگىن پارلامەنت ءماجىلىسىنىڭ جالپى وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترىنىڭ اتىنا ساۋال جولداعان دەپۋتات دانيا ەسپايەۆا وسى ماسەلەنى كوتەردى.
ونىڭ ايتۋىنشا، دەنساۋلىق ساقتاۋدى دامىتۋدىڭ 2011-2015 -جىلدارعا ارنالعان باعدارلاماسى اياسىندا بىلتىردان بەرى بالالار ەمحاناسى ەرەسەكتەر ەمحاناسىمەن بىرىكتىرىلگەن. وسىعان بايلانىستى بارلىق مەديتسينالىق مەكەمەلەردە جالپى تاجىريبەدەگى دارىگەر بالالاردى دا، ەرەسەكتەردى دە قابىلداي بەرەدى. ال مەديتسينالىق جوعارى وقۋ ورىندارىندا «پەدياتر» ماماندىعى جويىلعان. «مۇنداي جاڭالىق قوعام تاراپىنان ورىندى سىنعا ۇشىراۋدا. «اق جول» پارتياسىنا شاعىمدانعاندار وسىنىڭ سالدارىنان ەمحانالاردا ءبىر دارىگەرگە قارالۋ ءۇشىن اياعى اۋىر ايەلدەر دە، ەمشەكتەگى بالاسى بارلار دا، قارت كىسىلەر مەن جاس بالالار دا ۇلكەن كەزەككە تۇراتىنىن ايتادى. ونداي كەزەكتە تۇرعان ناۋقاستاردىڭ كوڭىل- كۇيلەرى ايتپاسا دا تۇسىنىكتى»، - دەيدى دەپۋتات.
بۇل رەتتە د. ەسپانوۆا مەديتسينالىق جوعارى وقۋ ورىندارىندا پەدياتريا فاكۋلتەتتەرىنىڭ جابىلۋى دا زور الاڭداۋشىلىق تۋدىراتىنىن العا تارتتى. ونىڭ ايتۋىنا قاراعاندا، بۇگىنگى كۇنى تەراپيەۆت دارىگەرلەر ءتورت ايلىق كۋرستاردان ءوتىپ، ونىڭ بارىسىندا ولار بالالار اراسىندا ەڭ كوپ تارالعان اۋرۋ تۇرلەرى تۋرالى عانا ءبىلىمىن جەتىلدىرەدى.
«بالالار اعزاسىنىڭ ەرەكشەلىگى ارنايى بىلىممەن قاتار ۇقىپتى قارىم- قاتىناستى دا تالاپ ەتەتىنى بەلگىلى. ماسەلەنىڭ مورالدىق- پسيحولوگيالىق قىرىنان بولەك، بالالاردى ەمدەۋدەگى ەندىگى دارىگەرلەردىڭ بىلىكتى ءارى ءتيىمدى قىزمەتى دە كۇمان تۋدىرادى. مۇنداي رەفورما اتا- انالاردىڭ عانا ەمەس، دارىگەرلەردىڭ وزدەرى تاراپىنان دا تۇسىنىسپەۋشىلىككە ۇشىراۋدا. ەڭ سوراقىسى، وسىنداي سىناقتان ءبىزدىڭ بالالارىمىز جاپا شەگىپ جاتىر. ال ونداي بىرىكتىرۋلەردىڭ تيىمدىلىگى تۋرالى ەشقانداي قورىتىندىلار قوعامعا بەلگىسىز»، - دەدى دەپۋتات.
بۇل رەتتە د. ەسپانوۆا وتباسى دارىگەرى پراكتيكاسىنا كوشۋدىڭ ماڭىزدىلىعىن تۇسىنە وتىرىپ، اتالعان باعدارلامادا قازاقستانداعى بالالار دارىگەرى بويىنشا قالىپتاسقان كوپجىلدىق وڭ تاجىريبەلەر ەسكەرىلمەگەنىن العا تارتادى.
