وزبەك پرەمەرى «رەسەيمەن ارىپتەستىگى نىعايا بەرەتىنىن» ايتتى
وزبەكستاننىڭ پرەمەر- ءمينيسترى ميرزيايەۆ رەسەي پرەزيدەنتى پۋتينمەن كەزدەسكەن كەزىندە ەكى ەلدىڭ «ستراتەگيالىق ارىپتەستىگى بولعانىن، بار ەكەنىن، بولا دا بەرەتىنىن» مالىمدەدى.
ول شاحي- زيندا زيراتىنداعى يسلام كاريموۆتىڭ مولاسىنا باردى. پۋتين وزبەكستان پرەزيدەنتىنىڭ وسى قالاداعى رەزيدەنسياسىنا دا بارىپ، كاريموۆتىڭ ونداعى فوتوسۋرەتىنە گۇل قويدى. رەسەي پرەزيدەنتى سول جەردە مارقۇمنىڭ جەسىرى تاتيانا كاريموۆا مەن كىشى قىزى لولا كاريموۆا- تيلليايەۆاعا كوڭىل ايتتى. كاريموۆتىڭ جاقىندارى مەن پۋتين اراسىنداعى ارى قارايعى اڭگىمە باسپا ءسوزدىڭ قاتىسۋىنسىز ءوتتى.
سولدان وڭعا: وزبەكستان پرەمەر- ءمينيسترى شاۆكات ميرزيايەۆ، يسلام كاريموۆتىڭ قىزى لولا كاريموۆا- تيلليايەۆا مەن جەسىرى تاتيانا كاريموۆا، رەسەي پرەزيدەنتى ۆلاديمير پۋتين. سامارقاند، 6 - قىركۇيەك 2016 -جىل.
«ناعىز دوس.. . ەڭ جاقىن دوس»
رەسەي پرەزيدەنتىن سامارقاندتا ەرتىپ بارعان وزبەكستان پرەمەرى شاۆكات ميرزيايەۆ پۋتيننىڭ ەلىنە ارنايى كەلۋىن ەرەكشە باعالايتىنىن ايتتى. ول «بۇل ەسكە الۋ - ەلدەر اراسىنداعى قارىم- قاتىناستىڭ اسا جوعارى دەڭگەيىن بىلدىرەتىنىن، بۇكىل وزبەك حالقى ءۇشىن ماڭىزدى ەكەنىن» ايتتى.
وزبەك ۇكىمەتىنىڭ باسشىسى رەسەي پرەزيدەنتىنە «رەسپۋبليكا ءۇشىن قايعىلى ساتتە «قولداۋ ءبىلدىرۋىن» ناعىز دوستىڭ قۇشاعىنا» تەڭەدى. ميرزيايەۆ وزبەكستان رەسەيمەن اراداعى ستراتەگيالىق ارىپتەستىك قاتىناستى نىعايتا بەرەتىنىن ايتىپ:
- ءسىزدىڭ بۇگىنگى كەلگەنىڭىزگە كوپ راحمەت. بۇل ارەكەت شىن نيەتىڭىزدى بىلدىرەدى، - دەدى.
ال رەسەي پرەزيدەنتى ۆلاديمير پۋتين «بۇعان دەيىن قالىپتاسقان جاقىن سەرىكتەستىك قاتىناس جالعاسا بەرەتىنىن» مالىمدەدى.
- يسلام ابدۋگانيەۆيچپەن اسىرەسە سوڭعى جىلدارى وتە جىلى، سەنىمدى، دوستىق قاتىناس ورناپ ەدى. سوندىقتان مەن ءۇشىن بۇل وتە اۋىر قايعى بولىپ تۇر. ول ەكى ەل اراسىنداعى بەرىك قاتىناستىڭ نەگىزىن قالاپ كەتتى. يسلام كاريموۆ جاساعان سول جۇمىس، سول باعىت جالعاسا بەرەدى دەپ ءۇمىت ارتامىز. ءبىز ءوز تاراپىمىزدان سەنىمدى ارىپتەستىك جولىنىڭ ۇزىلمەۋى ءۇشىن، وزبەك باسشىلىعى مەن وزبەك حالقىن قولداۋ ءۇشىن بارلىق جاعدايدى جاسايمىز. ەڭ جاقىن دوس رەتىندە بىزگە تولىق سەنۋلەرىڭىزگە بولادى، - دەدى ۆلاديمير پۋتين.
رەسەي پرەزيدەنتى وزبەكستانداعى ودان ارعى رەسمي قارالى جيىن شارالارىنا جۇمىس كەستەسىنىڭ تىعىزدىعىن ايتىپ، قاتىسپادى.
وزبەكستان پرەزيدەنتى يسلام كاريموۆتىڭ ينسۋلتتەن قايتىس بولعانى قىركۇيەكتىڭ 2- كۇنى حابارلانعان. ونى قىركۇيەكتىڭ 3- كۇنى سامارقانداعى حازرەت قىزىر مەشىتى اۋلاسىنداعى شاحي- زيندا بەيىتىنە اتا- اناسىنىڭ جانىنا جەرلەگەن.
78 جاسىندا دۇنيە سالعان كاريموۆتىڭ جەرلەۋىنە 17 ەلدەن دەلەگاتسيا بارعان. رەسەي دەلەگاتسياسىن سول ەلدىڭ پرەمەرى دميتري مەدۆەديەۆ باستاپ بارعان. ال ۆلاديمير پۋتين كاريموۆتى جەرلەۋ كۇنى الدىمەن ۆلاديۆوستوكتاعى فورۋمدا، ودان سوڭ قىتايداعى «ۇلكەن جيىرمالىق» سامميتىندە بولعان.
قازاقستاننان يسلام كاريموۆتى جەرلەۋ شاراسىنا ۇكىمەت باسشىسى كارىم ءماسىموۆ باستاعان رەسمي تۇلعالار قاتىسقان.
https://www.azattyq.org
