جىل سوڭىنا دەيىن استانا-پاۆلودار اۆتوجولىنىڭ ءبىر بولىگى پايدالانۋعا بەرىلەدى
بۇل تۋرالى پاۆلودار وبلىسى اكىمدىگىنىڭ باسپا ءسوز قىزمەتى حابارلايدى.
وبلىستىق اكىمدىكتە ايماق باسشىسى بولات باقاۋوۆتىڭ باسشىلىعىمەن وتكەن جينالىستا «قاز اۆتوجول» ا ق پاۆلودار وبلىستىق فيليالىنىڭ باسشىسى ەرسىن ساريەۆ «اۆتودور سەرۆيس فيرماسى» ج ش س قۇرىلتايشىلارىنىڭ اراسىنداعى سوت داۋى تۇيىندەلىپ، سوت شەشىمى بويىشا كومپانيانىڭ باس ديرەكتورى رەتىندە دەنيس گۋسيەۆ بەكىتىلگەنىن ءمالىم ەتتى.
- ءبىز كومپانيامەن قوسىمشا كەلىسىمشارت جاساستىق. قۇرىلىس فيرماسىنىڭ اتىنا جاڭا شوت اشىلىپ، جاقىندا وعان اتقارىلعان جۇمىستار ءۇشىن تولەنەتىن قاراجات تۇسەتىن بولادى، - دەدى ەرسىن ساريەۆ. - 5-10 كۇننىڭ ىشىندە جۇمىسشىلاردىڭ ەڭبەكاقىسى بويىنشا بەرەشەك تولىعىمەن وتەلەدى.
بايانداماشىنىڭ اقپاراتى بويىنشا، اۆتوموبيل جولىنداعى ەڭبەكاقىنىڭ تولەنبەۋىنە بايلانىستى توقتاپ قالعان جۇمىستار قايتا جانداندى. قازىرگى كەزدە جەردى وڭدەۋ جۇمىستارى جۇرگىزىلىپ جاتىر. سۋبمەردىگەر ۇيىمداردىڭ شوتتارىنا قاراجات تۇسكەننەن كەيىن جولعا بەتون جانە اسفالت جابىندىلارىن توسەۋ جۇمىستارى باستالادى. ايتا كەتەرلىگى، اعىمداعى جىلى قۇرىلىسشىلار پاۆلودار-استانا اۆتوجولىنىڭ ۇزىندىعى 104 كيلومەتردى قۇرايتىن ءبىر بولىگىن تاپسىرۋدى جوسپارلاپ وتىر.
سونىمەن قاتار، جينالىس بارىسىندا ەكىباستۇز-مايقايىڭ اۆتوموبيل جولىن رەسپۋبليكالىق مەنشىككە تاپسىرۋ بويىنشا جۇمىستار باستالعانى ءمالىم بولدى. الداعى اپتادا وبلىس اكىمدىگىنىڭ ءتيىستى قاۋلىسى قابىلدانادى دەپ جوسپارلانىپ وتىر. وسىعان بايلانىستى ايماق باسشىسى اتالمىش جولعا جوندەۋ جۇمىستارىن جۇرگىزۋ بويىنشا جوبالاۋ-سمەتالىق قۇجاتتاردى ازىرلەۋدى جىلدامداتۋدى تاپسىردى.