جاستىعىنا قاراماستان بىرنەشە بالانىڭ اناسى اتانعان قازاقستاندىق ارۋلار - فوتو
بۇل ورايدا دەموگرافياعا ۇلەسىن قوسىپ جۇرگەن اتا-انالاردىڭ ەڭبەگى زور. بۇگىن Stan.kz ءتىلشىسى جاس ءارى سۇلۋ انالاردى تۇگەندەپ كوردى.
دۇنيەگە بىرنەشە ءسابي اكەلىپ، سىرتقى كەلبەتىنە قاراماي كەتەتىن كەلىنشەكتەر جەتەرلىك. سونداي-اق، كەرىسىنشە «ادەمى بولماي قالامىن» نەمەسە «دەنە ءبىتىمىم وزگەرىپ كەتەدى» دەگەن قورقىنىشتان 1-2 سابيدەن ءارى اسپايتىن انالار دا بار.
الايدا ءبىزدىڭ بۇگىنگى كەيىپكەرلەرىمىز ەكەۋىنە دە جاتپايدى. بالكىم بىرنەشە بالانىڭ اناسى اتانىپ، وزدەرىن كۇتۋدى دە ۇمىتپاعان انالاردى كورگەندە وزگە قىز-كەلىنشەكتەر ويلاناتىن شىعار دەگەن ويدامىز.
ايدانا ەرالحانوۆا تامىز ايى بويىنشا قازاقستانداعى ەڭ ادەمى انا اتاندى. ايدانانى وقىرماندار Missis.kz سايتىندا ونلاين داۋىس بەرۋ ارقىلى تاڭداعان.
25 جاستاعى تارازدىق كەلىنشەكتىڭ 3 پەرزەنتى بار. ەكى ۇل، ءبىر قىزدىڭ اناسى بوس ۋاقىتىندا بالىق اۋلاپ، تىگىن تىگەدى. سونداي-اق، بوكسپەن اينالىساتىن ايدانا ناعىز اسپاز. ونىڭ قولىنان شىققان ۇلتتىق تاعامداردىڭ ءدامى ءتىل ۇيىرەدى.
ۇلگىلى جار، اياۋلى انا ايدانا مايكل دجەكسوننىڭ جانكۇيەرى ەكەن. ەندى ول Missis.kz 2016 بايقاۋىنىڭ فينالىندا وزگە قاتىسۋشىلارمەن باق سىناسادى.
كەلەسى كەيىپكەرىمىز ناعىز وڭتۇستىكتىڭ كەلىنى، شىمكەنتتىك - جادىرا ۋبايدۋللا قىزى. 28 جاستاعى ايەلدىڭ ءتورت بىردەي ۇلى بار.
ءۇيدىڭ تۇڭعىشى نۇركەلدى مەكتەپ وقۋشىسى. نۇركەلدىدەن كەيىن احمەتجان، راۋان، ءالينۇر ەسىمدى باتىرلاردى دۇنيەگە اكەلگەن انا تۇرمىس قۇرماي تۇرعاندا حالىققا قىزمەت كورسەتۋ ورتالىعىندا جۇمىس ىستەگەن.
جادىرا بوس ۋاقىتىندا بالالارىمەن بىرگە ءجۇزۋ باسسەينىنە بارعاندى ۇناتادى. جاس بۇلدىرشىندەر دە سپورتقا قۇمار كورىنەدى.
«بىرەۋى جۇزۋدەن، ەكىنشىسى دزيۋدودان، ءۇشىنشىسى بوكستان الەم چەمپيونى بولسا، ال بىرەۋى عىلىم مەن ءبىلىم جاعىنان تانىلسا دەپ ۇمىتەنەمىن»، - دەيدى جادىرا. مۇمكىن ءدال وسى بالاپانداردان بولاشاقتا دميتري بالاندين سياقتى وليمپيادا چەمپيونى شىعاتىن شىعار، كىم ءبىلسىن؟!
جاس بولسا دا ءۇش بىردەي ۇلى بار اياۋلى انالاردىڭ ءبىرى - تارازدىق گاۋحار اسقاربەكوۆا. ءۇش بالانىڭ اناسى كيەلى جامبىل جەرىندە تۇرادى. بەكزات ەسىمدى جىگىتپەن تۇرمىس قۇرعان كەلىنشەك «زاڭگەر» ماماندىعى بويىنشا ءبىلىم الىپ، تاراز قالالىق سوتىندا قىزمەت اتقارعان.
دامير، جاندوس جانە ءاليحان ەسىمدى ءۇش باتىردى دۇنيەگە اكەلگەن گاۋحار كوپبالالى انا بولۋدى ارماندايدى.
ءۇيدىڭ تۇڭعىشى دامير - 3- سىنىپ وقۋشىسى. نەبارى 8 جاستا بولسا دا، دامير اعىلشىن ءتىلىن ەركىن مەڭگەرگىسى كەلەدى. تاەكۆوندومەن دە اينالىسادى. وبلىستىق، رەسپۋبليكالىق جارىستاردا جۇلدەلى ورىنداردان كورىنىپ جۇرگەن جايى بار.
«بالالارىمنىڭ بولاشاعى ءۇشىن ايانىپ قالمايمىن»، - دەيتىن تارازدىق ارۋ جۋىردا كيىم ساتاتىن دۇكەنىن اشقان. زاڭگەر، كاسىپكەر، اياۋلى انا، ادال جار، بەس ساۋساعىنان ونەرى تامعان شەبەر اسپاز گاۋحاردىڭ بويىنان ناعىز قازاق كەلىنىنە ءتان قاسيەتتەردى تابۋعا بولادى.
ەلىمىزدە التىن قۇرساقتى انالار كوپ. ولاردىڭ ءبارىن ءبىر ماتەريالعا سىيعىزۋ مۇمكىن ەمەس! ال ءبىزدىڭ بار ويىمىز - جاستاي بىرنەشە بالانىڭ اناسى اتانعان ارۋلارىمىزدى وزگەلەرگە ۇلگى ەتۋ!
