ۇلتتىق مۋزەيدەگى التىن بۇيىمدار مەن قازاقتىڭ زەرگەرلىك زاتتارى كاتالوگ بولىپ شىعارىلدى - فوتو
«ەكى بىردەي كاتالوگ البومىنىڭ تۇساۋكەسەرى بولىپ جاتىر. بۇل ەكى كىتاپ ءبىزدىڭ «قازىنا» سەريامىزبەن شىعىپ جاتىر. وسى مۋزەيدە جينالعان التىن مەن كۇمىستەردىڭ بارلىعىن جيناقتاپ، ونى عىلىمي اينالىمعا ءتۇسىرۋ ءۇشىن جۇيەلەپ، كاتالوگتار جارىققا شىعارىلدى»، - دەدى ق ر ۇلتتىق مۋزەيىنىڭ ديرەكتورى دارحان مىڭباي.
وسى رەتتە ول ەلىمىزدىڭ اۋماعىندا كوپتەگەن قۇندى جادىگەرلەر تابىلعانىن ايتا كەلە: «بۇل زاتتار تەك ونەر مەن ورنەك قانا ەمەس، سول كەزدەگى ءبىزدىڭ اتا-بابالارىمىزدىڭ دۇنيەتانىمىن كورسەتەتىن ايعاقتى بەلگىلەر. ءبىز وسى جادىگەرلەرگە قۇرمەتپەن قارايمىز جانە ولاردىڭ ءارقايسىسى ءالى دە زەرتتەۋدى قاجەت ەتەدى. سوندىقتان اتالعان كاتالوگتاردىڭ شىعۋىنا ەڭبەگىن قوسقان بارشا ازاماتتارعا العسىمدى ايتامىن»، - دەدى.
سەريالىق باسىلىمدى دايىنداۋ مەن باسىپ شىعارۋداعى نەگىزگى ماقسات - قازاقستاننىڭ ەجەلگى جانە ورتاعاسىرلار تاريحى مەن مادەنيەتىنە قاتىستى تىڭ ماتەريالداردى جيناقتاۋ، عىلىمي تالداۋ جانە تولىققاندى دەرەك رەتىندە باسىپ شىعارۋ، عىلىمي اينالىمعا ەنگىزۋ.
كونە زاماننىڭ تەڭدەسسىز جاۋھارلارى ق ر ۇلتتىق مۋزەيىنىڭ ەكسپوزيتسياسىندا ماڭىزدى ورىن الادى.
التىن مەن كۇمىستەن جاسالعان بۇيىمدار توپتاستىرىلعان بۇل كاتالوگ قولا داۋىرىنەن ورتاعاسىرلارعا دەيىنگى جادىگەرلەرمەن تانىسۋعا مۇمكىندىك بەرەدى.
«كونە مۇرالاردىڭ ءىزى قازاق حالقىنىڭ ءداستۇرلى زەرگەرلىك ونەرىنەن دە انىق بايقالادى. ەگەر قولا داۋىرىنەن ورتاعاسىرلارعا دەيىنگى ۋاقىتتى التىن تۇسىمەن كوبىرەك بايلانىستىرساق، كەيىن كەلە بۇل تانىم كۇمىسكە اۋىسادى. زەرگەرلىك ونەر بۇيىمدارى توپتاستىرىلعان ەكىنشى كاتالوگتا ءداستۇرلى قازاق قوعامىنداعى بالالارعا، ەرلەر مەن ايەلدەرگە ارنالعان بۇيىمدار جان-جاقتى سيپاتتالادى. كوپشىلىك زاتتار قازاق قوعامىندا ورنى ەرەكشە، اۋلەتتىڭ، وتباسىنىڭ ۇيىتقىسى سانالاتىن ايەلدەرگە تيەسىلى»، - دەپ اتاپ وتىلگەن مۋزەي حابارلاماسىندا.
