قازاقستان كەن ورىندارىنان مۇناي الۋ ونىمدىلىگىن ارتتىرماق

استانا. قازاقپارات - ق ر ەنەرگەتيكا مينيسترلىگى ءىرى كومپانيالارمەن بىرلەسە قازاقستاندىق كەن ورىندارىندا مۇنايدى الۋ ونىمدىلىگىن ارتتىرۋ ادىستەرىن زەرتتەۋدى جوسپارلاپ وتىر.

ايتا كەتەيىك، بۇگىن استانادا مينيسترلىك، «قاز مۇناي گاز»، «قاز ترانس گاز» جانە «شەل قازاقستان» كومپانيالارى اراسىندا ىنتىماقتاستىق تۋرالى مەموراندۋمعا قول قويىلدى.

«وزدەرىڭىز بىلەسىزدەر، قازاقستاندا مۇنايدى ءوندىرۋ كوەففيتسەنتى ءتيىستى دەڭگەيدە ەمەس. وكىنىشكە قاراي، پوستكەڭەستىك كەڭىستىكتە مۇناي وندىرەتىن ەلدەر اراسىندا سوڭعى ورىنداردامىز. وسى رەتتە بۇل ماسەلەمەن ءبىز وتە بەلسەندى تۇردە اينالىسامىز»، - دەدى ق ر ەنەرگەتيكا ءمينيسترى قانات بوزىمبايەۆ قۇجاتقا قول قويعاننان كەيىن.

سونىمەن قاتار تاراپتار وزگە ەكى باعىتتى زەرتتەۋگە ۋاعدالاستى. ونىڭ ىشىندە قاراشىعاناق كەن ورنى شيكىزاتىمەن گازحيميالىق كەشەننىڭ قۇرىلىسىن جۇرگىزۋ مۇمكىندىگى مەن جاڭاراتىن ەنەرگيا كوزدەرىن دامىتۋداعى ىنتىماقتاستىق قامتىلعان.

اۆتور: رۋسلان عابباسوۆ