اقتوبەدە اباقتىدا مۇسىلماندارعا ناماز وقىتپاعان جىگىتتىڭ بوستاندىققا شىققاندا باسى بالەگە قالدى
تۇرمەدە مۇسىلمان جىگىتتەرگە ناماز وقىتپاي، تۇرتپەكتەپ تيىسكەن جىگىتتىڭ بوستاندىققا شىققاندا باسى بالەگە قالعان دەپ حابارلايدى وڭىردەن NUR. KZ ءتىلشىسى.
سوتقا شاعىم تۇسىرگەن ونىڭ ايتۋىنشا، كەزىندە ءوزى تۇرمەدەگى مۇسىلماندارعا ناماز وقىتپاعانى ءۇشىن بوستاندىقتا جۇرگەن باۋىرلار قىسىمعا العان. ولار ونى قورقىتىپ، ءىرى كولەمدە اقشا تالاپ ەتكەن. ايتۋىنشا، ءتورت جىگىت سوققىعا جىعىپ، 5 ميلليون تەڭگە سۇراعاندا ءوز ءومىرى ءۇشىن قورىققانىنان ەكى بولمەلى پاتەرىن سولاردىڭ اتىنا اۋدارىپ بەرەمىن دەپ جالىنعان.
«ولار مەنى ماشيناعا وتىرعىزىپ، اباي كوشەسىندەگى پاتەرلەردىڭ بىرىنە اپاردى. سول جەردە اياق قولىمدى، اۋىزىمدى سكوتچپەن بايلاپ تاستادى. قالتامداعى ەكى تەلەفون مەن قۇجاتتارىمدى الىپ كەتتى»، - دەگەن جابىرلەنۋشى تەرگەۋدە بەرگەن جاۋابىندا.
شاعىمدانۋشى سوتقا دەيىنگى جاۋابىندا «ارتۋر» ەسىمدى كۇدىكتىنىڭ ەسىمىن بىرنەشە رەت اتاعانىمەن سوت كەزىندە ونىڭ اتىن اۋىزىنا دا العان جوق. باستى كۇدىكتىلەردىڭ ءبىرى رەتىندە تانىلعان ارتۋر قاماۋعا دا الىنباعان. قازىر كۇدىكتىلەردىڭ قاتارىندا تەك ءۇش جىگىت وتىر.
سۋديا تاراپىنان «سىزگە قىسىم كورسەتۋدى ۇيىمداستىرعان ارتۋر ما؟» دەگەن سەكىلدى بىرنەشە ناقتىلاۋ سۇراعى قويىلعانىمەن جابىرلەنۋشى ول تۋرالى ەشتەڭە ايتقان جوق.
ارىزدانۋشى تۇرمەدە جازاسىن وتەۋ كەزىندە ءوندىرىس سەكتورىندا ءتوراعا قىزمەتىن اتقارعان. ول ءوزى قاتارلاس سوتتالۋشىلارعا جۇمىس ءبولىپ بەرىپ وتىرعان. ول سول كەزدە سوتتالعاندار اراسىنداعى ناماز وقيتىن توپقا كەدەرگى كەلتىرگەنىن ايتتى.
«ناماز وقىعاندا ۋاقىت كەتەدى. مەن رۇقسات بەرگەن جوقپىن. وعان اتالمىش مەكەمەدە رۇقسات بەرىلمەگەن. ولار نامازدى كەشكى بوس ۋاقىتتارىندا وقي الادى. مەن ءدىن جولىنداعى جىگىتتەرگە ناماز وقىتپاعانىم ءۇشىن شىققاندا قىسىمعا الدى»، - دەيدى جابىرلەنۋشى.
قازىر جابىرلەنۋشىنىڭ ءوزى ومىرىنە تونگەن قاۋىپتەن ساقتانۋ ءۇشىن كۇزەتپەن ءجۇر. سۋديادان كۇدىكتى رەتىندە ۇستالعانداردى بوساتۋدى بىرنەشە رەت جالىنىپ سۇرادى.
