ماسكەۋدە «جۇلدىزدار توعىسقاندا» فيلمىنىڭ كورسەتىلىمى ءوتتى
شاراعا ق ر مادەنيەت جانە سپورت ءمينيسترى ارىستانبەك مۇحامەدي ۇلى، قازاقستاننىڭ رەسەيدەگى توتەنشە جانە وكىلەتتى ەلشىسى مارات تاجين، ر ف مادەنيەت ءمينيسترى ۆلاديمير مەدينسكي، سونىمەن قاتار ەكى مەملەكەتتىڭ كورنەكتى مادەنيەت جانە ونەر قايراتكەرلەرى قاتىستى.
ايتا كەتەيىك، ەلباسىنىڭ ءومىرى مەن قىزمەتى تۋرالى فيلمنىڭ كورسەتىلىمىن رەسەي فەدەراتسياسىنىڭ مادەنيەت مينيسترلىگى ۇيىمداستىردى.
فيلم سيۋجەتى بويىنشا قازاقستان پرەزيدەنتى ونىڭ ءومىربايانىن جازۋ ءۇشىن كەلگەن اعىلشىن جازۋشىسى دجەرەمي ۆيلسونمەن كەزدەسەدى. الايدا جوسپارلانعان سۇحبات جۋرناليست پەن ەلباسىمىزدىڭ قازاقستان بويىنشا ۇزاق ساپارىنا اينالىپ كەتەدى. ۆيلسون قازاق ەلىن ارالاپ قانا قويماي، 1950، 86، 89، 91-جىلدارداعى وقيعالار تۋرالى حاباردار بولادى. ەل كارتاسىنداعى كەز كەلگەن جەر پرەزيدەنتىمىزدىڭ ومىرىندە ەرەكشە ورىن الادى.
ايتا كەتەيىك، فيلمدەگى باستى ءرولدى، ياعني ەلباسى ءرولىن تانىمال قازاقستاندىق اكتەر بەرىك ايتجانوۆ سومدادى. سونىمەن قاتار فيلمنىڭ تۇسىرىلىمىنە الەكسەي گۋسكوۆ، يگور ۋگولنيكوۆ، داريا موروز، حيۋ فرەيزەر، سەرگەي گارماش، قارلىعاش مۇحامەدجانوۆا جانە وزگە اكتەرلار قاتىستى.
ەسكە سالا كەتەيىك، «جۇلدىزدار توعىسقاندا» بيوگرافيالىق دراماسى ق ر پرەزيدەنتى نۇرسۇلتان نازاربايەۆ تۋرالى «ەلباسى جولى» كينوداۋىرناماسىنىڭ جالعاسى بولىپ تابىلادى. فيلمنىڭ قازاقستانداعى تۇساۋكەسەرى ۇستىمىزدەگى جىلدىڭ 26- ساۋىرىندە وتسە، رەسەيدە العاش رەت ول ماسكەۋ قالاسىنىڭ كينو ۇيىندە 16- مامىردا كورسەتىلدى.
فيلم كورسەتىلىمى اياسىندا ۆ. ميحايلوۆ پەن ت. مانسۇروۆتىڭ «نۇرسۇلتان نازاربايەۆ» كىتابىنىڭ تۇساۋى كەسىلىپ، قازاقستان رەسپۋبليكاسى مادەنيەت جانە سپورت مينيسترلىگى مەن رەسەي فەدەراتسياسى مادەنيەت مينيسترلىگى 2017-2019-جىلدارعا ارنالعان مادەنيەت سالاسىنداعى ىنتىماقتاستىق باعدارلاماسىنا قول قويىلدى.
