قازاقستاندىق شەكاراشىلار «قوردايدا» ادامداردىڭ ۇلكەن ءنوپىرى بولاتىنىنا دايىن بولماعانىن مويىندادى

تاراز. قازاقپارات - «قورداي» وتكىزۋ بەكەتىندە مەملەكەتتىك شەكارادان وتەتىن ادامدارعا جايلى جاعداي جاسالادى. بۇل تۋرالى جامبىل وبلىسىنىڭ اكىمى كارىم كوكىرەكبايەۆتىڭ قورداي اۋدانىنا ساپارى بارىسىندا بەلگىلى بولدى،

 دەپ حابارلادى وبلىس اكىمىنىڭ باسپا ءسوز قىزمەتى.

كارىم كوكىرەكبايەۆ «قورداي» وتكىزۋ بەكەتىندە بولعان كەزدە قر  ۇ ق ك شەكارا قىزمەتىنىڭ باسشىسى، گەنەرال- مايور دارحان ءدىلمانوۆ وسى وتكىزۋ بەكەتىنىڭ ينفراقۇرىلىمى تاۋلىگىنە 9 مىڭعا دەيىن ادامدى جانە 500-600 بىرلىك كولىكتى وتكىزۋگە ەسەپتەلگەنىن ءتۇسىندىردى.

 جازدا ادامدار اعىنى ۇلعايادى، وسى ۋچاسكەدە مەملەكەتتىك شەكارانى ورتاشا ەسەپپەن 25 مىڭ ادام جانە 2 مىڭعا دەيىن اۆتوموبيلدەر كەسىپ وتەدى. قازاقستان شەكاراسىنىڭ پەريمەترى بويىنشا 98 وتكىزۋ بەكەتى بار، 2015 -جىلى ولار ارقىلى 46 ميلليون ادام وتكەن.

 «وسى جىلعى ماۋسىم- شىلدە ايلارىندا عانا شەكارانى  946660 ادام جانە  93630 كولىك قۇرالدارى كەسىپ ءوتتى. بۇل بەلگىلى ءبىر قيىندىقتار تۋدىردى، - دەدى د. ءدىلمانوۆ. - «قورداي» وتكىزۋ بەكەتىنىڭ ماڭىزدى ءرولىن ءتۇسىنۋ ءۇشىن، وسى كەزەڭدە ول ارقىلى التى ميلليوننان استام ادام وتكەنىن اتاپ وتكىم كەلەدى. قازىرگى كەزدە قىرعىزستان ەۋرازيالىق ەكونوميكالىق وداققا كىردى، ءبىرقاتار كەدەرگىلەر كەيىن سەرپىلدى، جاڭا جاعدايلار ءبىزدىڭ الدىمىزعا جاڭا تالاپتار قويىپ وتىر. ينفراقۇرىلىم بۇل جۇمىسقا تولىققاندى ءازىر بولماعانىن مويىنداۋ كەرەك. سوندىقتان دا قازىر ۇ ق ك- ءنىڭ شەكارا قىزمەتى نەعۇرلىم جايلى جاعداي جاساۋ ءۇشىن بارلىق شارالاردى قولعا الدى. كەيبىر ماسەلەلەردى وبلىس اكىمدىگىمەن، ال كەيبىرىن رەسپۋبليكالىق دەڭگەيدە شەشۋگە تۋرا كەلەدى. قازىر وسى وتكىزۋ بەكەتىن ۇلتتىق كىرىستەر كوميسسياسى بالانسىنان ۇ ق ك بالانسىنا بەرۋ ۇدەرىسى ءجۇرىپ جاتىر».

قازىرگى كۇندە قانداي ناقتى شارالار قابىلداندى نەمەسە جاعدايدى جاقسارتۋ ءۇشىن قانداي جۇمىستار جاسالاتىنى جونىندە ءوڭىر باسشىسىنا ق ر ۇ ق ك شەكارا قىزمەتىنىڭ «وڭتۇستىك» ايماقتىق باسقارماسىنىڭ باستىعى، پولكوۆنيك ارمان قاليەۆ باياندادى.

«قورداي باقىلاۋ- وتكىزۋ بەكەتىندە كولىك قۇرالدارى قوزعالىسى جولاعىن سەگىزگە دەيىن ۇلعايتا وتىرىپ، كۇردەلى جاڭارتۋ جۇرگىزۋ جوسپارلانىپ وتىر. قۇجاتتاردى تەكسەرەتىن قىزمەتكەرلەر سانى 40-قا دەيىن كوبەيەدى. جاڭا تەرمينال قۇرىلىسى اياقتالىپ كەلەدى، بۇل ادامدار مەن كولىكتەردى ىرعاقتى وتكىزۋدى قامتاماسىز ەتەدى. العاشقى باقىلاۋ ءبولىمىنىڭ شتاتىن 184 ادامنان 297 ادامعا دەيىن كەزەڭ- كەزەڭىمەن ۇلعايتۋ ماسەلەسى قارالۋدا»، - دەپ اتاپ ءوتتى ول.

وبلىس اكىمى قولدانىستاعى وتكىزۋ تەرمينالدارىن ارالاپ كوردى جانە تەكسەرۋ ۋاقىتىن قىسقارتۋ جونىندە ناقتى كەڭەستەر بەردى.

 «نازار اۋدارىڭىزدار، باقىلاۋ- وتكىزۋ بەكەتىندە قۇجاتتاردى تەكسەرەتىن 6 تەرمينال ورناتىلعان. ولاردىڭ ەكەۋىندە كەزەكتە تۇرىپ قالعاندار كوپ، ال باسقا ەكەۋىندە تەكسەرۋشىلەر جوق، تاعى ەكەۋى قىزمەتكەرلەرى وتىرسا دا، جۇمىس جاساپ تۇرعان جوق، ادامدارعا ەڭ جاقىن تەرمينالدارعا عانا ەمەس، باسقالارىنا دا كەلىڭىزدەر، دەپ ايتۋ سونشا قيىن با؟ قاۋىرت ساعاتتاردا ادامدار كوبەيگەن كەزدە، قانشا ۋاقىت ۇنەمدەۋگە بولار ەدى! جەكە زاتتارىن تەكسەرەتىن جەردە دە ادامدار كوپ جينالعان. بۇل ارادا قۇجاتتاردى تەكسەرۋگە كەلەسى ادام ءوتۋى ءۇشىن دابىل بەرەتىن شام جانىپ كورسەتىپ تۇرۋى ءتيىس. ادامدار جينالاتىن ورىن جايلى، اۋا رايىنا بەيمدەلگەن، قىستا جىلىتىلاتىن بولۋى قاجەت. اۋىزسۋ كوزىن ورناتۋ، مەديتسينالىق اپتەچكا، قاجەتتى ءدارى- دارمەك بولۋى ءتيىس. جولدا جۇرگەندە ءارتۇرلى جاعداي كەزدەسۋى مۇمكىن عوي. قورشاۋلاردى الىپ تاساۋ قاجەت، ادامدار وزدەرىن ەركىن سەزىنەتىن بولسىن»، - دەدى ءوڭىر باسشىسى.

بۇدان ءارى ك. كوكىرەكبايەۆ شەكارا قىزمەتىنىڭ باسشىسى د. دىلمانوۆپەن بىرگە قورداي اۋدانىنداعى «سورتوبە»، «اۋقاتتى» جانە «قاراسۋ» وتكىزۋ بەكەتتەرىندە بولدى. ولاردىڭ جۇمىسىنا ەلەۋلى ەسكەرتۋلەر بولعان جوق. ادامدار لەگى كوپ ەمەس، ال «قاراسۋ» باقىلاۋ- وتكىزۋ بەكەتى نەگىزىنەن مەملەكەتتىك شەكارا ارقىلى جۇك كولىكتەرىن وتكىزۋمەن جۇمىس جاساۋدا.

بۇدان باسقا، ك. كوكىرەكبايەۆ پەن د. ءدىلمانوۆ تىكۇشاقپەن جامبىل وبلىسى اۋماعىنداعى شەكارا ۋچاسكەلەرىن شولىپ شىقتى. مەركە اۋدانىنداعى «سىپاتاي باتىر»، جامبىل اۋدانىنداعى «ايشا ءبيبى»، رىسقۇلوۆ اۋدانىنداعى «مەركە- تەمىرجول» باقىلاۋ- وتكىزۋ بەكەتتەرىندە بولدى.