حاڭجوۋدا «ۇلكەن جيىرمالىق» ءسامميتى قورىتىندىسىندا كومميۋنيكە قابىلداندى
«حاڭجوۋداعى G20 ءسامميتى تابىستى اياقتالدى. سوڭعى ەكى كۇن بويى جاھاندىق باسقارۋ ساياساتىن كۇشەيتۋ، ساۋدا مەن قارجىنى دامىتۋ (...) بويىنشا پىكىرتالاس جۇرگىزىلدى. سامميت قورىتىندىسىندا كومميۋنيكە قابىلداندى، ول باعىت- باعدار بەرىپ، ماقساتتاردى بەلگىلەدى. سامميت قاتىسۋشىلارى الەمدىك ەكونوميكانى دامىتۋدىڭ جاڭا يننوۆاتسيالىق جولدارى تۋرالى ۋاعدالاستى»، - دەپ مالىمدەدى ق ح ر ءتوراعاسى شي جينپيڭ قورىتىندى باسپا ءسوز ءماسليحاتىندا.
ونىڭ اتاپ وتۋىنشە، فيسكالدى جانە مونەتارلى ساياساتقا ارقا سۇيەيتىن ەسكى جولدان گورى يننوۆاتسيالىق جولمەن دامۋدى ىنتالاندىرۋ قاجەت. بۇل جايت G20 ءسامميتىنىڭ قورىتىندى قۇجاتىندا كورىنىس تاپقان. سونىمەن قاتار قاتىسۋشىلار الەمدىك ەكونوميكا مەن قارجىنى باسقارۋ جۇيەسىن جاقسارتۋ ماسەلەسىندە دە ىمىراعا قول جەتكىزە العان.
«ءبىز الەمدىك شارۋاشىلىقتىڭ تۇراقتىلىعىن ارتتىرۋ ءۇشىن جاھاندىق ەكونوميكا مەن قارجىنى باسقارۋدى جاقسارتۋعا شەشىم قابىلدادىق. حالىقارالىق قارجى ينستيتۋتتارىنداعى داۋىستاردى ءبولۋ جانە كۆوتالاۋدى رەفورمالاۋدى ىلگەرىلەتۋگە ۋاعدالاستىق»، - دەدى ول.
سونىمەن قاتار ول حالىقارالىق ساۋدا مەن ينۆەستيتسيا رەجىمدەرىن جاڭعىرتۋ تۋرالى ۋاعدالاستىققا قول جەتكىزىلگەنىن باسا ايتتى.
«ءبىز حالىقارالىق ساۋدا مەن ينۆەستيتسيانى جاڭعىرتۋعا، اشىق الەمدىك ەكونوميكا قۇرۋعا شەشىم قابىلدادىق. ساۋدا مەن ينۆەستيتسيالىق تەتىكتەردى جاقسارتۋعا ۋاعدالاسىپ، الەمدىك باسقارۋدى ۇيلەستىرۋگە باعىت الدىق. ءبىز ەركىن ساۋدا رەجىمىن قولدايمىز جانە پروتەكتسيونيزمگە قارسىمىز»، - دەپ اتاپ ءوتتى شي جينپيڭ.
ونىڭ ايتۋىنشا، G20 سامميتىنە قاتىسۋشىلار شۇعىل ارەكەت ەتۋ تەتىگىنەن ۇزاقمەرزىمدى باسقارۋ مەحانيزمىنە كوشۋ ماڭىزدىلىعىن اتاپ وتكەن. «بۇل شارالار حالىقارالىق ساۋداعا كەدەرگىلەردى جويىپ، رەسۋرستاردى، وندىرىستىك فاكتورلار مەن قىزمەتتەردى ءبولۋ تيىمدىلىگىن ارتتىرادى»، - دەدى شي جينپيڭ.
ەسكە سالساق، 1- قىركۇيەكتە ن. نازاربايەۆ ق ح ر ءتوراعاسى شي جينپيڭنىڭ شاقىرۋىمەن G20 سامميتىنە قاتىسۋ ءۇشىن قىتايعا كەلدى. ءبىرىنشى سەسسيادا مەملەكەت باسشىسى جاھاندىق ەكونوميكا ماسەلەلەرىن شەشۋ جولدارى تۋرالى ءوز بولجامدارىن ايتتى.
اۆتور: مارلان جيەمباي
