نۇرسۇلتان نازاربايەۆ تاياۋ شىعىستاعى احۋالدى تۇراقتاندىرۋعا وڭ ىقپال ەتتى - تۇركيا جۋرناليستەرى

حاڭجوۋ. قازاقپارات - تۇركيا مەن رەسەي اراسىنداعى قارىم- قاتىناستاردىڭ جاقسارۋىنا عانا ەمەس، جالپى تاياۋ شىعىس ايماعىنداعى احۋالدى تۇراقتاندىرۋعا وڭ سەرپىن بەرگەن قازاقستان پرەزيدەنتى نۇرسۇلتان نازاربايەۆقا تۇركيا حالقى ۇلكەن سىيلاستىقپەن قارايدى.

 G20 ءسامميتى كەزىندە «قازاقپارات» تىلشىسىنە بەرگەن سۇحباتتارىندا تۇركيالىق جۋرناليستەر وسىنداي پىكىرىمەن ءبولىستى.

«قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ G20 سامميتىنە قاتىسۋى، سىزدەردىڭ ەلدەرىڭىزدىڭ جانە مەملەكەت باسشىلارىڭىزدىڭ ۇلكەن ابىرويىن كورسەتەدى. تۇركيا مەن قازاقستان - باۋىرلاس مەملەكەتتەر. تۇركيا حالقى جانە پرەزيدەنت رەجەپ ەردوعان سىزدەردىڭ ەلباسىلارىڭىزدى قاتتى سىيلايدى»، - دەدى «ساباح» گازەتىنىڭ ءتىلشىسى حاسان اي.

ونىڭ ءسوزى بويىنشا، ن. نازاربايەۆ تۇركيا مەن رەسەي اراسىن جاقىنداستىرۋدا ۇلكەن ءرول اتقاردى. 15- شىلدەدە اسكەري توڭكەرىستەن كەيىن تۇركياعا العاش كەلگەن كوشباسشى - قازاقستان پرەزيدەنتى بولدى.

 «بۇل ءبىز ءۇشىن وتە ماڭىزدى. كەشە سامميت اياسىندا فوتوسۋرەتكە ۇجىمداسا ءتۇسۋ كەزىندە ر. ەردوعان مەن ن. نازاربايەۆ يىقتاسىپ تۇردى، كەيىن سالتاناتتى ءراسىم اياقتالعان سوڭ، ەكەۋارا كەزدەسۋ وتكىزدى»، - دەپ اتاپ ءوتتى حاسان اي.

«GBTimes» ستامبۇلدىق بيۋروسىنىڭ ءتىلشىسى كاميل ەردوعدانىڭ پىكىرىنشە، ق ر پرەزيدەنتى ن. نازاربايەۆتىڭ G20 سامميتىنە قاتىسۋى، قىتاي باسشىلىعىنىڭ جاھاندىق ماسەلەلەردى شەشۋگە ايماقتىق كوشباسشىلاردى تارتۋ ىنتاسىنان تۋعان. ال قازاقستان ورتالىق ازيا ەلدەرىندە بۇلتارتپاس كوشباسشى ەكەنى انىق. ەكىنشى جاعىنان - ن. نازاربايەۆتىڭ الەمدىك ساياسات ارەناسىنداعى جەكە بەدەلى دە بار.

«قازاقستان - تۇركيالىق حالىقتىڭ جۇرەگىندە ەرەكشە ءىلتيپاتقا يە ەل. قازاقستان پرەزيدەنتى ماسكەۋ مەن انكارا قارىم- قاتىناستارىن جاقسارتۋعا ىقپال ەتىپ، تۇركيا مەن رەسەي اراسىندا مەدياتور ءرولىن عانا اتقارعان جوق، سونىمەن قاتار ءبىزدىڭ ايماقتاعى (تاياۋ شىعىستاعى - رەد.) احۋالدى تۇراقتاندىرۋعا وڭ سەرپىن بەردى. سىزدەردىڭ كوشباسشىلارىڭىز وتە تاجىريبەلى مەملەكەتتىك قايراتكەر. ول تاراپتار اراسىنداعى شيەلەنىستى سەيىلتۋگە قولدان كەلەر بارلىق كۇشىن جۇمسادى»، - دەدى ول.

 ەسكە سالا كەتەيىك، 1 - قىركۇيەكتە ق ر پرەزيدەنتى ن. نازاربايەۆ ق ح ر ءتوراعاسى شي جينپيڭنىڭ شاقىرۋىمەن G20 سامميتىنە قاتىسۋعا كەلدى. سامميت ق ح ر حاڭجوۋ قالاسىندا قىركۇيەكتىڭ 4-5- ارالىعىندا وتۋدە. العاشقى سەسسيادا مەملەكەت باسشىسى بايانداما جاساپ، جاھاندىق ماسەلەلەردى شەشۋدىڭ وزىندىك جولدارىن ۇسىندى. سامميت كەزىندە ن. نازاربايەۆ ءبىرقاتار ەلدەردىڭ پرەزيدەنتتەرىمەن جۇزدەستى، ونىڭ ىشىندە تۇركيا پرەزيدەنتى ر. ەردوعان دا بار.