ۇ ق ك: قازاقستاندا قۇرىقتالعان راديكالدىق توپتار حالىقارالىق لاڭكەستەر ىقپالىندا بولعان

استانا. قازاقپارات - قازاقستاندا جىل باسىنان بەرى سەگىز راديكالدىق توپ قۇرىقتالدى. ولاردىڭ ءبىر بولىگى حالىقارالىق سودىرلاردىڭ باسشىلىعىمەن بايلانىسا وتىرىپ، ارەكەت ەتكەن. بۇل تۋرالى ق ر ۇلتتىق قاۋىپسىزدىك كوميتەتىنىڭ باسپا ءسوز قىزمەتىنەن حابارلاندى.

 «2016 -جىلدىڭ باسىنان بەرى قۇقىققا قايشى ارەكەتتەرگە تالپىنىپ جۇرگەن ءتورت ازامات پەن سەگىز راديكالدى توپ انىقتالىپ، اۋىزدىقتالدى. قۇرىقتالعان توپتىڭ ءبىر بولىگى حالىقارالىق تەرروريستىك ۇيىم سودىرلارىنىڭ باسشىلىعىمەن جانە تىكەلەي سولاردىڭ نۇسقاۋىمەن ارەكەت ەتىپ كەلگەن»، - دەلىنگەن ۇ ق ك تاراتقان باسپا ءسوز بايانىندا.

ۆەدومستۆو كەلتىرگەن مالىمەتتەرگە قاراعاندا، 2016 - جىلدىڭ ماۋسىم ايىندا قاراعاندى وبلىسىندا ءبىر- بىرىمەن بايلانىستى راديكالدى تۇلعالاردان تۇراتىن ەكى توپتىڭ جولى كەسىلدى.

«بۇل رەتتە ولاردىڭ ارەكەتىنە جالپى باسشىلىق پەن ۇيلەستىرۋ شارالارى شەتەلدەگى قازاقستاندىق سودىرلار ارقىلى جۇزەگە اسقان. ولاردىڭ ءبىر مۇشەسى سوعىس بولىپ جاتقان ايماققا بارۋعا دايىندالىپ، كەيىننەن قازاقستاننىڭ شەكاراسىن زاڭسىز كەسىپ وتپەك بولعان جەرىنەن ۇستالدى»، - دەپ جازادى ينتەرفاكس اگەنتتىگى انتي تەرروريستىك ورتالىق شتابىنىڭ وكىلى ساكەن مىڭبايەۆتىڭ ءسوزىن كەلتىرە وتىرىپ.

ونىڭ ايتۋىنشا، اتالعان توپتىڭ مۇشەلەرى قازاقستان اۋماعىندا تەرروريستىك شابۋىلدار جاساۋعا دايىندالعان، سونىڭ ىشىندە بالقاش ماڭىنداعى رەسەيلىك اسكەري ءبولىمدى نىساناعا الماق بولعان. جالپى ارنايى وپەراتسيالار بارىسىندا 8 ادام تۇتقىندالىپ، بىرەۋى ۇستاۋ بارىسىندا ءوزىن- ءوزى جارىپ جىبەرگەن.

 «سونىمەن قاتار، راديكالدار بالقاش قالاسىنىڭ ماڭىنان، گۇلشات اۋىلىنان جانە بالقاش ستانساسىنان 4 جاسىرىن قويمالار جاساعان. ونىڭ ءبىرى ءتىپتى ءبىر كۇدىكتىنىڭ اتا- اناسىنىڭ باقشاسىندا قازىلعان. تەرروريستىڭ اتا- اناسى ءتىپتى بۇل تۋرالى بىلمەيتىن دە، ودان كۇدىكتەنبەگەن دە بولىپ شىقتى. جاسىرىن قويمالاردان قارۋ- جاراقتار، وق- دارىلەر، سونىمەن بىرگە، قولدان جاسالاتىن جارىلعىش زاتتاردىڭ كوپ مولشەردەگى كومپونەنتتەرى، حيميالىق زاتتار، مەتالل كەسەتىن زاتتار الىندى»، - دەلىنگەن باسپا ءسوز بايانىندا.

ۇ ق ك مالىمەتتەرىنە قاراعاندا، تەرروريستىك توپ مۇشەلەرى ادام جوق ايدالادا ونداي جارىلعىش قۇرىلعىلاردىڭ قۋاتىن سىناقتان دا وتكىزىپ كورگەن.

«توپتىڭ مۇشەلەرى «شاحيد بەلدىگى» اتالاتىن وسىنداي جارىلعىش زاتتىڭ ەكەۋىن جاساپ ۇلگەرگەن. ونىڭ بىرەۋى ۇستاۋ بارىسىندا ءوزىن- ءوزى جارىپ جىبەرگەن بولاتىن. ال تاركىلەنگەن كومپونەنتتەر وسىنداي 50-گە تارتا جارىلعىش زاتتاردى جاساۋعا جەتەتىن ەدى. ءبىزدىڭ ساراپشىلارىمىزدىڭ باعالاۋى بويىنشا، جارىلعىش زاتتاردىڭ مۇنشالىقتى كولەمىمەن كوپقاباتتى تۇرعىن ءۇيدى تولىق قيراندىعا اينالدىرۋعا بولادى»، - دەپ اتاپ ءوتتى س. مىڭبايەۆ.

ەسكە سالا كەتەيىك، اعىمداعى جىلدىڭ ماۋسىم ايىندا قاراعاندى وبلىسىنىڭ بالقاش قالاسى مەن گۇلشات اۋىلىندا قولدان جاسالعان جارىلعىش قۇرىلعىنى قولدانۋ ارقىلى تەرروريستىك اكتىنى جوسپارلاعان راديكالدى توپتىڭ جولى كەسىلدى. ۇلتتىق قاۋىپسىزدىك كوميتەتىنىڭ باسپا ءسوز قىزمەتى حابارلاعانداي، گۇلشات اۋىلىندا قىلمىسكەرلەردى ۇستاۋ بارىسىندا تەررورشىلاردىڭ بىرەۋى ءوز- ءوزىن جارىپ جىبەرىپ، العان جاراقاتتاردان كوز جۇمدى.

قازاقستان رەسپۋبليكاسىنىڭ قىلمىستىق كودەكسىنىڭ 257-بابىنىڭ 1-بولىمىنە، 287-بابىنىڭ 5-بولىمىنە سايكەس، 5 لاڭكەسكە تەررورلىق توپ قۇرىپ، زاڭسىز جولمەن قارۋ- جاراق، وق- ءدارى، جارىلعىش زاتتار مەن قۇرىلعىلار تاسىمالدادى دەگەن ايىپ تاعىلدى. قامالعانداردىڭ ۇلكەنىنىڭ جاسى 37-دە، كىشىسى - 26-دا. كۇدىكتىلەردىڭ بارلىعى - قاراعاندى وبلىسىنىڭ تۋمالارى. لاڭكەستىڭ توپتىڭ 2016 -جىلدىڭ ءساۋىر ايىندا قۇرىلعانى ءمالىم بولدى.

اۆتور: قانات مامەتقازى ۇلى