سانجار ماديەۆ «التىن وردا» كينو جوباسىنىڭ سۋرەتىن جاريالادى
رەسەي كينەماتوگرافشىلارى «تاقتار ويىنى» («Game of Thrones»)، «سۇلتان سۇلەيمەن» سەريالدارىنا ۇقساس تەلەجوبا ازىرلەپ جاتىر. «التىن وردا» دەپ اتالاتىن سەريال XIII عاسىرداعى كيەۆ رۋسى مەن التىن وردا اراسىنداعى قارىم- قاتىناستى سۋرەتتەيدى.
جوبامەن «مارس مەديا» جانە «امەديا» كومپانيالارى اينالىسادى. ءبىرىنشى ماۋسىم 16 سەريادان قۇرالادى، جوبانىڭ جالپى بيۋدجەتى 400 ميلليون رۋبل دەپ ايتىلۋدا. ءتۇسىرىلىمنىڭ 70 پايىزى تاتارستاندا، سودان كەيىن ماسكەۋ مەن قىرىمدا وتەدى.
قازاقستاننان ارۋجان جازىلبەكوۆا، دينا تاسبولاتوۆا، سانجار ماديەۆ، داۋلەت ءابدىعاپاروۆ سەكىلدى اكتەرلەر قاتىسادى. «التىن وردا» 2017 - جىلى كۇزدە ەفيرگە شىعادى دەپ جوسپارلانعان.
سيۋجەتى: XIII عاسىردىڭ سوڭى. ەجەلگى رۋس شىڭعىس حان ۇرپاقتارىنىڭ قول استىندا. ۇلى كنياز ياروسلاۆ تارام- تارام بولعان ورىس كنيازدىقتارىن بىرىكتىرىپ، بوداندىقتان بوساۋدى ارماندايدى. ءبىراق باستى جاۋى جانىنان تابىلادى - ولار كنياز بوريس پەن ۇلكەن ۇلى ۆلاديمير ەدى. رۋس استاناسىنا التىن وردا ەلشىسى - ءتاڭىر تەمىر كەلەدى. ول ورداعا ورىستان جاۋىنگەر جيناۋعا كەلگەن ەدى. ءبىراق ول مىناداي شارت ۇسىنادى: ەگەر ۇلى كنياز وعان بوريستىڭ قالىڭدىعى - كنياگينا ۋستينيانى ايەلدىككە بەرسە، ساربازداردىڭ ءبىر بولىگىن قالدىرادى. ياروسلاۆ وعان كەلىسىم بەرگىسى كەلمەيدى، الايدا بوريستىڭ ءوزى بۇعان مويىنسۇنادى. وسىلايشا بوريس كنياز تاعىنا قول جەتكىزۋدى ويلاعان ەدى. ءسويتىپ ۋستينيا كەرۋەنمەن بىرگە ورداعا اتتانادى.
ەلشى كەتىپ بارا جاتىپ ۇلى حاننان اكەلگەن «سىيلىعىن» قالدىرادى - ول كنيازعا ارنالعان جاس سۇلۋ نارگيز ەدى. ەندى كنياز ەكى وتتىڭ ورتاسىندا قالادى: ءبىر جاعىندا جاڭا عاشىعى نارگيز تۇرسا بەن ەكىنشى جاعىندا ونى قابىلداماعان حالقى مەن ءبىرىنشى ايەلى ياروسلاۆا ەدى.
وسى كەزدە التىن وردا حانى بەركە كۇنىنىڭ جاقىنداپ قالعانىن سەزىپ، مۇراگەر قالدىرۋدى ويلايدى. ول 16 جاسار ايجان ەسىمدى قىزدى ءۇشىنشى ايەل قىلىپ الادى. ەلشىمەن بىرگە ورداعا كەلگەن ورىس ازاماتتارىنىڭ ءبىرى - جاس سۋرەتشى نيكولكا وسى ايجانعا عاشىق بولىپ قالادى.
تەلەجوباعا تارتىلعان ماماندار دا ءارتۇرلى ۇلتتاردان تۇرادى: ورىستار، ارمياندار، تاتارلار، بەلارۋستەر، ەۆرەيلەر، قازاقتار، گرۋزيندەر، ۋكرايندار.
