قىتايعا ساپارىم وتە جوعارى دەڭگەيدە ءوتتى - ق ر پرەزيدەنتى
«مەنىڭ قىتاي حالىق رەسپۋبليكاسىنا جۇمىس ساپارىم وتە جوعارى دەڭگەيدە ءوتتى، اسىرەسە ءبىز ايتقان ەكىجاقتى قارىم- قاتىناس ماسەلەلەرىنىڭ بارلىعىنا قىتايلىق تاراپتىڭ ىقىلاسى ەرەكشە بولدى. بىردە- ءبىر ماسەلە شەشۋسىز قالمادى. ءبىز بۇرىن كەلىسە الماي جۇرگەن قازاقستان اۋماعىنداعى زاماناۋي كاسىپورىندار قۇرىلىسى جايلى ناقتى كەلىسىم جاسادىق. بۇل ءتىزىم 51 نىساندى قامتيدى، ونىڭ ەكەۋى سالىندى، تورتەۋى بيىل 2,5 ميلليارد دوللار قاراجاتقا سالىنادى جانە 5 جىل بويى قۇنى 26 ميلليارد دوللار بولاتىن كاسىپورىندار سالىنادى»، - دەدى ول.
مەملەكەت باسشىسى ق ر مەن ق ح ر اراسىندا مەملەكەت جانە كومپانيالار دەڭگەيىندەگى ورتاق قورلاردىڭ جۇمىس ىستەيتىنىن اتاپ ءوتتى.
«جىبەك جولى قورى جۇمىس ىستەيدى، بۇل جۇمىستى قولداۋ ءۇشىن بانك قۇرىلدى جانە ارينە، ەڭ باستىسى - ەكى ەل اراسىنداعى كولىكتىك- كوممۋنيكاتسيالىق بايلانىس. جىل سايىن تىنىق مۇحيتتان قىتاي ارقىلى ەۋروپاعا، رەسەيگە، ورتالىق ازياعا قازاقستان ارقىلى جۇك ءترانزيتى ۇلعايدى، اقتاۋ پورتىن پايدالانۋ دا بىرنەشە ەسەگە كوبەيدى، مۇنداي ديناميكا بۇرىن بولماعان»، دەدى ن. نازاربايەۆ.
«مۇنىڭ ءبارى «قورعاس» قۇرعاق پورتى قۇرىلىسىنىڭ، «قورعاس- الماتى» ءۇش ءجۇز شاقىرىمدىق تەمىر جول قۇرىلىسى اياقتالۋىنىڭ ارقاسىندا، قىتاي شەكاراسىنان كاسپييگە دەيىن جەتەتىن تەمىر جولدىڭ، «باتىس- قىتاي - باتىس ەۋروپا» اۆتوكولىك جولىنىڭ ارقاسىندا جۇزەگە استى»، - دەدى مەملەكەت باسشىسى.
پرەزيدەنت قاشاعان ءىرى كەن ورنى پايدالانۋعا بەرىلگەن سوڭ، قىتايعا ەنەرگيا رەسۋرستارىن جەتكىزۋ مۇمكىندىكتەرىنىڭ كوبەيەتىنىن اتاپ ءوتتى.
«قازىر ءبىز شامامەن 7 ميلليون توننا جەتكىزۋدەمىز، ونى 20 ميلليون تونناعا دەيىن كوتەرۋگە بولادى جانە قازاقستاننان قىتايعا گاز جەتكىزۋدى دە ۇلعايتۋعا مۇمكىندىك بار»، - دەپ، ەلباسى ەنەرگەتيكا سالاسىنا ايرىقشا ءمان بەردى.
ەكىجاقتى ىنتىماقتاستىقتىڭ ەڭ ماڭىزدى اسپەكتىسى رەتىندە ن. نازاربايەۆ اۋىل شارۋاشىلىعىن اتادى.
«اۋىل شارۋاشىلىعىندا، بارىنەن بۇرىن، العاش رەت قىتايعا بيداي، باسقا دا ءداندى داقىلدار، بۇرشاق، ەت، قۇس ونىمدەرىن جەتكىزۋ تۋرالى كەلىسىمگە قول جەتكىزدىك. ەندى اۋىل شارۋاشىلىق ونىمدەرىن وندىرۋشىلەرگە جول اشامىز»، - دەدى ول.
ونىڭ ايتۋىنشا، قازاقستان كيبەرقاۋىپسىزدىكتى قامتاماسىز ەتۋ بويىنشا قىتاي تاجىريبەسىن ۇلگى ەتۋى ءتيىس.
