بايان ەسەنتايەۆانىڭ كۇيەۋىنە قاتىستى ءىستىڭ سۇمدىق جاي- جاپسارى بەلگىلى بولدى
وقيعانىڭ سۇمدىق جاي- جاپسارىن سايتقا الماتى وبلىستىق پروكۋراتۋراسى حابارلاعان.
«ءوزىنىڭ كولىگىندە باقىتبەك ەسەنتايەۆ جۇبايىن الدىمەن زورلاعان، سودان كەيىن ءتورت جەردەن وعان پىشاق سالعان» ، - دەپ پروكۋراتۋراداعىلار سوتقا دەيىنگى تەرگەۋدىڭ بۇگە- شىگەسىن ايتىپ بەردى.
پروكۋراتۋرانىڭ مالىمەتى بويىنشا، باقىتبەك ەسەنتايەۆ كەمىندە 12 جىلعا باس بوستاندىعىنان ايرىلادى.
الماتى وبلىستىق پروكۋراتۋراسى باقىتبەك ەسەنتايەۆتىڭ قىلمىستىق ءىسىن سوتقا جىبەردى. ول ءوزىنىڭ جۇبايى - بەلگىلى قازاقستاندىق پروديۋسەر بايان ەسەنتايەۆانى ولتىرمەك بولعانى جانە ونى زورلاعانى ءۇشىن ايىپتالىپ وتىر.
وسى جاساعان قىلمىستارى ءۇشىن وعان كەمىندە 12 جىل باس بوستاندىعىنان ايرىلۋ قاۋپى ءتونىپ تۇر» ، - دەپ جازىلعان ماقالادا.
بۇدان بولەك، بايان ەسەنتايەۆا كۇيەۋىن ەشقاشان كەشىرمەيتىنىن مالىمدەگەن. بەلگىلى پروديۋسەر تەرگەۋشىلەردەن ونى بارىنشا قاتاڭ جازاعا تارتۋدى سۇرادى.
ال، بايان ەسەنتايەۆانى سوققىعا جىعۋ ءىسى سوتتا جابىق رەجيمدە قارالادى.
«بۇل ءىستى ايۋاندىقپەن قىلمىس جاسالعان جەردەگى تالعار اۋداندىق سوتى ەمەس، قىلمىستىق ىستەر بويىنشا مامانداندىرىلعان الماتى وبلىستىق سوتى قارايدى. وتىرىستاردىڭ بارلىعى جابىق رەجيمدە وتكىزىلەدى» ، - دەلىنگەن ماتەريالدا.
ەستەرىڭىزدە بولسا، بايان ەسەنتايەۆانى نەلىكتەن كۇيەۋى سوققىعا جىققانى جايىندا باقىتبەك ەسەنتايەۆتىڭ قورعاۋشىسى، بەكبولات جەكسەيىتوۆ ايتىپ بەرگەن ەدى. ونىڭ سوزىنە قاراعاندا، ەسەنتايەۆانىڭ كۇيەۋى بۇل ارەكەتكە وتباسىن ساقتاپ قالۋ ءۇشىن بارعان، ءارى ول ءوزىنىڭ بۇل ارەكەتى ءۇشىن وكىنەدى. قورعاۋشىنىڭ ايتۋىنشا، باقىتبەك ەسەنتايەۆ ۋاقىتشا تەرگەۋ يزولياتورىندا جاتقاندىقتان، ونىڭ بايانمەن بايلانىسقا شىعىپ، ودان كەشىرىم سۇراۋعا مۇمكىندىگى جوق.
ەستەرىڭىزگە سالا كەتەيىك، بايان ەسەنتايەۆا ماۋسىمنىڭ ونى كۇنى بىرنەشە جەردەن پىشاقتالىپ، اۋىر جاراقاتپەن اۋرۋحاناعا تۇسكەن بولاتىن.
ونى ولتىرمەك بولدى دەگەن كۇدىكپەن پروديۋسەردىڭ كۇيەۋى باقىتبەك ەسەنتايەۆ تۇتقىندىلدى. كەيىن ونىڭ وقيعا كەزىندە ماس بولعانى انىقتالدى. تەرگەۋشىلەردىڭ بولجامى بويىنشا، ەسەنتايەۆتار اراسىنداعى داۋ قىزعانىش نەگىزىندە تۋعان. جۇبايلار باقىتبەك ەسەنتايەۆتىڭ جيەنىمەن بىرگە الماتى سىرتىندا كولىكپەن كەلە جاتقان.
جول بويىندا قىزعانىشقا بۋلىققان كۇيەۋى باياندى ۇرا باستايدى. جولداعى بەنزين قۇيۋ ستانتسيالارىنىڭ بىرىندە كۇيەۋى كولىكتى جۇرگىزىپ كەلە جاتقان جيەنىن ءتۇسىرىپ تاستاپ، ايەلىن ودان ارى سوققىعا جىعىپ، پىشاقتاپ تاستايدى. وقيعا ورنىنا جەتكەن ولاردىڭ قىزى (ىستەگى ماتەريالدار بويىنشا) اكەسىن توقتاتىپ، اناسىن تالعارداعى اۋرۋحاناعا جەتكىزىپ ۇلگەرەدى.
كۇدىكتىنى تۇتقىنداۋ مەرزىمى قىركۇيەكتىڭ ونىنا دەيىن ۇزارتىلدى.
20 - ماۋسىمدا بايان ەسەنتايەۆانى اۋرۋحانادان شىعارىپ، وپەراتسيا جاساعان دارىگەر ونىڭ مۇرنىنا پلاستيكالىق وپەراتسيا جاساۋ قاجەتىلىگى بار ەكەنىن ايتقان ەدى.
جۇلدىزدىڭ ومىرىنە بەي- جاي قاراي المايتىن قازاقستاندىقتار الەۋمەتتىك جەلىدە ونى قولداۋ ناۋقانىن جاريالادى.
بايان ەسەنتايەۆانىڭ تالعار اۋرۋحاناسىنداعى رەانيماتسيادا جاتقان ءساتىن رۇقساتسىز ءتۇسىرىپ، فوتوسىن الەۋمەتتىك جەلىگە جاريالاۋ ءىسى بويىنشا تەرگەۋ ءجۇرىپ جاتىر. پروديۋسەردىڭ ءسىڭىلىسى باعىم مۇحيتدەنوۆا سۋرەتكە تۇسىرگەن اۋرۋحانا قىزمەتكەرى جازاعا تارتىلاتىنىن ايتقان بولاتىن.
بۇعان دەيىن بايان ەسەنتايەۆا Today.kz تىلشىسىنە بەرگەن سۇحباتىندا كۇيەۋىنىڭ وتە قىزعانشاق ەكەنىن مالىمدەدى.
«ول وتە قىزعانشاق، ءبىز ءبىر- بىرىمىزگە ۇزاق ۋاقىت بويى ۇيرەنىستىك. مەن ءۇش رەت اجىراسقىم كەلدى، العاشقى ون جىلدى سوعىس دەۋگە ابدەن بولادى» ، - دەگەن پىكىرىمەن بولىسكەن ەدى قازاقستاندىق بەلگىلى پروديۋسەر.
25-تامىزدا شەتەلدە ەمدەلگەن بايان ەسەنتايەۆانىڭ قازاقستانعا ورالعانى بەلگىلى بولدى. ول ءوزىنىڭ Instagram پاراقشاسىندا بەتىن كورسەتىپ تۇسكەن العاشقى سۋرەتىن جاريالادى. بۇعان دەيىن پروديۋسەر جەلىگە تەك ارقاسىن كورسەتىپ تۇرعان سۋرەتتەر عانا سالىپ كەلدى.
